“Toshshahartrans” binosida yongʻin sodir boʻldi

12:33 11 Fevral 2019 Jamiyat
259 0

Foto: dyxx.uz

11 fevral kuni “Toshshahartrans” AJ binosida yongʻin sodir boʻldi. Bu haqda IIV YOXBB OAV bilan hamkorlik qilish boʻlinmasi xabar berdi.

Qayd qilinishicha, soat 08:30 da Toshkent shahar IIBB Yongʻin xavfsizligi boshqarmasi Yongʻinni oʻchirish kuch va vositalarini boshqarish va muvofiqlashtirish markaziga Yunusobod tumani, “Buyuk Turon” mahallasi A.Temur 1-tor koʻchasi 6-uyda joylashgan “Toshshahartrans” AJ binosida yongʻin sodir boʻlayotganligi haqida xabar kelib tushgan.

Xabar asosida yongʻin joyiga zudlikda 5 ta asosiy va 2 ta maxsus yongʻin oʻchirish ekipajlari jalb etilgan. Boʻlinmalar soat 08.35 da voqea joyiga yetib kelib, yongʻin soat 08.52 da toʻliq bartaraf etilgan.

Yongʻin “Toshshahartrans” AJ binosida ijarada boʻlgan “VY MIRAGE SONSTRUCTION DESIGN” MCHJga qarashli mebel ishlab chiqarish korxonasi bosh ofisida yuzaga kelib, oqibatda 60 kv.metr maydonda imoratning tom va shift qismi yonib zararlangan. Tan jarohati olganlar va halok boʻlganlar yoʻq.

Koʻrilgan tezkor harakatlar natijasida yongʻindan binoning 400 kv.metr maydoni saqlab qolingan. Yongʻin holati yuzasidan tergovga qadar tekshiruv olib borilmoqda. Yongʻin sababi va moddiy zarar miqdori aniqlanmoqda.


Izohlar

Hozircha hech kim fikr bildirmagan. Balki Siz birinchilardan bo'larsiz?