Shu munosabat bilan uyushtirilgan tadbirda Surxondaryo viloyati hokimligi, davlat va jamoat tashkilotlari vakillari, mahalliy va markaziy ommaviy axborot vositalari xodimlari, sohada uzoq yillar mehnat qilgan faxriylar ishtirok etishdi.

Tadbirda qayd etilganidek, tamomila yangi qiyofa kasb etgan matbuot uyi mamlakatimiz mustaqilligining 27 yilligi arafasida viloyat ijodkor ziyolilar uchun munosib tuhfa boʻldi. Toʻrt qavatli inshoot bundan oʻttiz yil muqaddam bunyod etilgan boʻlib, oʻtgan yillar mobaynida biror marotaba ham taʻmirlanmagani bois nochor ahvolga kelib qolgandi. “Santexgazmontaj” xususiy korxonasi tomonidan bu yerda amalga oshirilgan kapital taʻmirlash ishlariga 7 milliard soʻmdan ziyod mablagʻ sarflandi. Binoning zamonaviy tashqi qiyofasiga mos ichki shart-sharoitlar ham bugungi davr talablariga moslashtirildi. Isitish tizimi bunyod etildi. Xonalar qattiq va yumshoq mebellar, qishda isitib, yozda sovitadigan konditsionarlar bilan jihozlandi. Bu yerda zamonaviy axborot kommunikatsiya texnologiyalaridan unumli foydalanish uchun ham qulayliklar muhayyo etildi. Birinchi qavatda matbuot anjumanlari oʻtkaziladigan keng va yorugʻ zal, kutubxona, kitob doʻkoni, ikkinchi qavatda majlislari zali yosh ijodkorlar toʻgaragi xonalari mavjud.

- Mamlakatimizda soʻz va matbuot erkinligi taʻminlanib, OAV xodimlari uchun yaratib berilayotgan bugungi shart-sharoitlarni koʻrib nihoyatda ruhlandim, -deydi mehnat faxriysi Abdulla Xolmirzayev. – Bugungi biz yangi davrda yashayapmiz. Hozirda jamiyatdagi yangilanish, tub islohotlar jurnalistlar zimmasiga ulkan vazifalarni yuklamoqda. Diyorimizda hamda dunyoda roʻy berayotgan voqeiliklarni tezkor yoritish, uni keng xalq ommasiga yetkazishda jurnalistlardan alohida faollik va hozirjavoblik talab etilayotir. Shu maʻnoda, oʻylaymanki, matbuot uyidagi qulay sharoitlar har qanday ijodkorni zamon bilan hamnafas faoliyat olib borishga undaydi.

Matbuot uyi binosida matbuot va axborot boshqarmasi,Oʻzbekiston Yozuvchilar uyushmasi, Oʻzbekiston Jurnalistlari ijodiy uyushmasi viloyat boʻlimlari, “Surxon tonggi” va “Zarya Surxana” birlashgan tahririyati va boshqa bir qator davriy nashrlari qatorida respublika gazetalarining viloyatdagi muxbirlari uchun ham alohida xonalar ajratildi.

Ilhom RAHMATOV, “Xalq soʻzi” muxbiri.