Tailand Vazirlar Mahkamasi tomonidan Oʻzbekiston, shuningdek, yana 20 ta mamlakat turistlari uchun viza toʻlovlari bekor qilindi.

“Bangkok Rost” gazetasining yozishicha, ushbu qoida 2019 yilning 1 yanvaridan 31 dekabriga qadar amal qiladi. Unga koʻra, Tailandga 15 kunlik muddatga boradigan oʻzbekistonlik sayyohlar uchun 2000 bat (60 AQSH dollari) miqdoridagi yigʻim bekor qilingan.

Mazkur roʻyxatdan Oʻzbekistondan tashqari Andorra, Butan, Bolgariya, Xitoy, Kipr, Efiopiya, Fiji, Hindiston, Qozogʻiston, Latviya, Litva, Maldiv orollari, Malta, Mavritaniya, Papua-Yangi Gvineya, Ruminiya, San-Marino, Saudiya Arabistoni, Tayvan va Ukraina davlatlari ham joy olgan.

Tailand immigratsiya xizmati maʼlumotiga koʻra, mamlakatga viza olib kelayotgan turistlar soni 2016 yildan buyon pasayib borayotir. Mazkur tashabbus esa ularning sonini 30 foiz oshirishga yordam berishi kutilmoqda.

Oʻz navbatida, ushbu choradan koʻzlangan maqsad mamlakatga xitoylik sayyohlarni ham qaytarishdir. Sababi, Pxuketda roʻy bergan va 47 kishining umriga zomin boʻlgan kema falokatidan soʻng xitoylik sayyohlarning Tailandga kelishi keskin qisqarib ketgan. Ushbu chora-tadbirlar natijasida mamlakatga kelayotgan sayyohlar 38 mln.dan 40 mln.gacha oshishi kutilmoqda.