Sog‘liqni saqlash vazirligi murojaatdan so‘ng tibbiyot muassasasi rahbariga nisbatan qat’iy chora ko‘rdi

17:24 13 Iyul 2018 Jamiyat
458 0
Illyustrativ foto

Yurtimizda fuqarolarning murojaatlari bilan ishlash, ularda ko‘tarilgan har bir masalaga chuqur yondashib, hal etish tizimi yo‘lga qo‘yildi. Ushbu tizim bugun tibbiyot sohasida ham o‘z ifodasini topmoqda.

Kuni kecha Sog‘liqni saqlash vazirligiga bir guruh fuqarolar yo‘llagan murojaatlardan so‘ng, Toshkent viloyati sud-tibbiy ekspertiza byurosida xizmat tekshiruvi o‘tkazildi. Vazirlikning Yuridik bo‘limi tomonidan Toshkent viloyati sud-tibbiy ekspertiza byurosi faoliyati o‘rganilganda, haqiqatan ham, qator kamchiliklarga yo‘l qo‘yilgani ma’lum bo‘ldi.

Sog‘liqni saqlash vazirligi Axborot xizmati xabariga ko‘ra, Toshkent viloyati sud-tibbiy ekspertiza byurosida O‘zbekiston Respublikasida tan olinmagan diplom bilan shaxslarni davlat sud eksperti sifatida ishga qabul qilish holati, ish haqi va unga tenglashtirilgan to‘lovlarning noto‘g‘ri hisoblanishi va to‘lanishi, eng achinarlisi, umuman foydalanishga yaroqsiz bo‘lgan tibbiy vositalardan foydalangan holda ekspertiza o‘tkazish va xulosa tuzish kabi bir qator qonunbuzarliklarga yo‘l qo‘yilgani aniqlangan. Shu munosabat bilan, Toshkent viloyati sud-tibbiy ekspertiza byurosi boshlig‘i M. Xaydarov belgilangan tartibda egallab turgan lavozimidan ozod etildi, to‘plangan materiallar esa aybdor shaxslarning javobgarligini hal etish uchun prokuratura idoralariga yuborilgan.

Davlatimiz rahbari ta’kidlaganidek, tibbiyot xodimlari salomatligimiz posbonlaridir. Ularga xalq ishonishi, ular esa xalqni ishontira olishi kerak. Bugungi kun shifokorining shiori ham, o‘z oldiga qo‘ygan maqsadi ham aynan xalq ishonchi va aholi roziligi bo‘lmog‘i lozim.


Izohlar

Hozircha hech kim fikr bildirmagan. Balki Siz birinchilardan bo'larsiz?