Shavkat Mirziyoyev aholini toza ichimlik suvi bilan taʼminlash boʻyicha ustuvor vazifalarga bagʻishlangan yigʻilish oʻtkazdi

18:46 05 Sentyabr 2019 Siyosat
151 0

Oʻzbekiston Respublikasi Prezidenti Shavkat Mirziyoyev 5-sentyabr kuni aholini toza ichimlik suvi bilan taʼminlash boʻyicha ustuvor vazifalarga bagʻishlangan yigʻilish oʻtkazdi.

Mamlakatimiz aholisini, ayniqsa 11 mingdan ziyod qishloqlarni toza ichimlik suvi bilan taʼminlash oʻta dolzarb masala boʻlib qolmoqda.

Tanqidiy-tahliliy ruhda oʻtgan ushbu tadbirda davlatimiz rahbari taʼkidlaganidek, oxirgi 2 yilda ichimlik suvi va kanalizatsiya tizimini yaxshilashga 2 trillion 400 milliard soʻm ajratildi. Bu avvalgi 10 yilda ajratilgan jami mablagʻdan 2 baravar koʻp demakdir.

Shunga qaramasdan, mamlakatimizda markazlashgan tarmoqlar orqali toza ichimlik suvi bilan taʼminlash darajasi 68 foizni tashkil etmoqda. Bu koʻrsatkich, jumladan, Qoraqalpogʻistonda 52 foiz, Buxoroda 53, Qashqadaryo va Surxondaryoda 54, Xorazmda 56 foizga yetgan, xolos.

Yigʻilishda qayd etilishicha, Toshkent shahrida suv taʼminoti korxonalari rentabelligi 7 foiz, Andijon va Qashqadaryoda 6, Navoiyda 3 foizni tashkil etadi.

27 ming kilometr yoki 38 foiz suv tarmoqlari avariya holatida boʻlsa, 2 mingta yoki 20 foiz suv nasoslari ishdan chiqqan. Yurtimiz shaharlarining faqat 79 tasida (57 foiz) kanalizatsiya tizimi mavjud, uning ham 23 foizi taʼmirga muhtoj.

Yigʻilishda, shuningdek, bugungi kunda ichimlik suvi ishlab chiqarish va tarqatish inshootlarining 85 foizida hisobga olish tizimi mavjud emasligi ham tanqid qilindi.

Jami 3 million 280 ming nafar suv isteʼmolchidan atigi 44 foiziga, yaʼni 1 million 425 ming xonadonga hisoblagich oʻrnatilgani sohada ishlar sustkashlik bilan amalga oshirilayotganini koʻrsatmoqda.

Ayniqsa, qishloqlarda koʻplab egasiz suv inshootlari mavjud (birgina Boʻka tumanida, masalan, 60 dan ortiq shunday obyektlar bor).

Davlatimiz rahbari bu va bunga oʻxshash muammolarni hal etish uchun sohada olib borilayotgan ishlarni keskin jadallashtirish lozimligini taʼkidladi. Hisob-kitoblarga koʻra, 2030-yilga qadar suv taʼminotini shaharlarda 98, qishloqlarda 85 foizga, kanalizatsiya tizimini 31 foizga yetkazish koʻzda tutilgan. Buning uchun 4,5 milliard dollar mablagʻ kerak boʻladi.

Bunday ulkan maqsadlarga erishish uchun esa hozirdanoq muhim vazifalarni hal etish zarurligi koʻrsatib oʻtildi.

Avvalo, tariflarni erkin bozor talablari asosida belgilash va sohaga xususiy investitsiyalarni jalb qilish kerak. Qolaversa, toza ichimlik suvi ishlab chiqarish va tarqatish inshootlari hamda isteʼmolchilarni 2022-yil oxiriga qadar 100 foiz hisoblagichlar bilan taʼminlash lozimligi qayd etildi.

Shu maqsadda Moliya vazirligi, Uy-joy kommunal xizmat koʻrsatish vazirligiga 2020-yil 1-yanvardan tariflarni xizmatlar tannarxini toʻliq qoplash va modernizatsiya xarajatlarini hisobga olgan holda belgilash vazifasi yuklatildi.

Shuningdek, olis va togʻli hududlar aholisini toza ichimlik suvi bilan taʼminlash xarajatlarining bir qismini davlat tomonidan qoplab berish tartibi joriy qilinishi belgilab qoʻyildi.

Bundan tashqari, tajriba tariqasida suv va kanalizatsiya tizimini tadbirkorlarga davlat-xususiy sherikchilik asosida berish choralari koʻrilishi taʼkidlandi.

Yigʻilishda belgilangan vazifalarni bajarish yuzasidan soha rahbarlari axborot berdi.


Izohlar

Hozircha hech kim fikr bildirmagan. Balki Siz birinchilardan bo'larsiz?