Senator Mirabror Usmonov vafot etdi

10:09 15 Mart 2019 Siyosat
566 0

Oʻzbekiston Milliy Olimpiya qoʻmitasi, Oʻzbekiston futbol federatsiyasi (ayni vaqtda assotsiatsiya maqomida) sobiq rahbari, senator Mirabror Usmonov vafot etdi. Bu haqda ”Xalq soʻzi Online”ga Sogʻliqni saqlash vazirligidagi manba maʼlum qildi.

Mirabror Usmonov 12 mart kuni oʻpka va nafas yoʻllari bilan bogʻliq kasallik sabab Milliy olimpiya qoʻmitasi klinikasining (“Ezgu niyat”) reanimatsiya boʻlimiga yotqizilgandi.

Marhumning janozasi bugun soat 12:00da Yunusobod tumanidagi “Minor” masjidida oʻqiladi.

Maʼlumot uchun, Mirabror Usmonov 2006 yildan 2017 yilgacha Oʻzbekiston futbol federatsiyasi prezidenti lavozimida ishlagan. 2013 yildan 2017 yilgacha Milliy Olimpiya qoʻmitasi rahbari sifatida ham faoliyat yuritgan. 2005 yildan bugungi kunga qadar u Oliy Majlis senatori sifatida faoliyat yuritib kelayotgandi.

”Xalq soʻzi” gazetasi marhumning oila-aʼzolariga, yaqinlariga chuqur hamdardlik bildiradi.


Izohlar

Hozircha hech kim fikr bildirmagan. Balki Siz birinchilardan bo'larsiz?