Samarqandda qurilish ishlaridagi talon-torojliklar yuzasidan 5 ta jinoyat ishi qoʻzgʻatildi

11:59 28 Avgust 2020 Jamiyat
457 0

Maʼlumki, 2022-yilda Samarqandda Shanxay hamkorlik tashkilotiga (SHHT) aʼzo davlatlar rahbarlarining navbatdagi sammiti boʻlib oʻtadi. Ayni paytda SHHT sammitiga tayyorgarlik boʻyicha bir qator obyektlarni qurish va rekonstruksiya qilish ishlari amalga oshirilmoqda. 

Bosh prokuratura tomonidan Samarqand shahrida navbatdagi sammitni oʻtkazishga tayyorgarlik borasida amalga oshirilayotgan qurilish-obodonlashtirish ishlari oʻrganildi.

Oʻzbekiston Respublikasi Prezidentining 2018-yil 16-martdagi qarori bilan Samarqand viloyati hokimligi huzurida Obodonlashtirish va farovonlikni oshirish jamgʻarmasi tashkil etilgan. Jamgʻarma hisobidan viloyat hokimligi huzuridagi “Yagona buyurtmachi xizmati” injiniring kompaniyasi buyurtmachiligida hududiy infratuzilmani yaxshilash va obodonlashtirish maqsadida suv taʼminoti va kanalizatsiya, ichki yoʻllar, ijtimoiy obyektlar kabi 10 ta yoʻnalishda qurilish va taʼmirlash, moddiy-texnik bazani mustahkamlashga qaratilgan tadbirlar olib borilmoqda.

Qurilishlar oʻrganilganda jamgʻarma hisobidan davlat xaridlarini amalga oshirishda qonunchilik talablariga toʻliq rioya etilmayotgani aniqlandi.

Jumladan, Vazirlar Mahkamasining 2019-yil 18-sentyabrdagi 783-qaroriga asosan tuzilgan roʻyxatdagi avtomobil yoʻllariga oid 4 ta, ichimlik va oqova suv tarmoqlariga oid 8 ta obyekt qurilishi noqonuniy ravishda, yaʼni pudratchilarni tender orqali aniqlamasdan, loyiha hujjatlarini tayyorlash bilan birgalikda olib borilmoqda.

Bundan tashqari, viloyatdagi obyektlar qurilishida mablagʻdan toʻgʻri foydalanilishi ustidan moliyaviy nazorat hamda qurilish meʼyorlari va qoidalariga rioya etilishi ustidan texnik nazorat toʻgʻri tashkil etilmagan. Bu esa ajratilayotgan pullarning talon-toroj qilinishi, ishlarning sifatsiz bajarilishiga sabab boʻlyapti. Hozir aniqlangan holatlar yuzasidan 5 ta jinoyat ishi qoʻzgʻatilib, tergov oʻtkazilmoqda.

Misol uchun, Samarqand shahar Afrosiyob koʻchasining 1,9 kilometrlik qismida “F.G.” MCHJ ichimlik va oqova suv tarmoqlarini oʻrnatgan, “S.Y.» UK koʻchaning ayni shu qismiga asfalt yotqizgan. Biroq 2020-yilning aprel oyiga kelib yoʻlda koʻplab notekisliklar hosil boʻlib, yotqizilgan asfalt yaroqsiz ahvolga tushib qolgan.

Suv tarmoqlarini tortish hamda asfalt yotqizishning qonuniyligi oʻrganilganda, pudratchilar tender oʻtkazmasdan tanlangani, qurilish loyiha-smeta hujjatlarini ishlab chiqish bilan parallel ravishda, ekspertizadan oʻtkazilmasdan turib olib borilgani aniqlandi. Shuningdek, oqova suv tarmogʻini tortishda qurilish meʼyorlari qoʻpol ravishda buzilgan. Jumladan, 85 mln. soʻm pul qoʻshib yozish orqali talon-toroj qilingan. Bundan tashqari, jamgʻarma hisobidan qurilish, taʼmirlash, obodonlashtirish ishlarini bajarishda jami 7,4 mlrd. soʻm pul talon-toroj qilingani va notoʻgʻri sarflangani aniqlandi.

Qurilish, taʼmirlash va obodonlashtirish jarayonida yoʻl qoʻyilgan kamchiliklarni bartaraf etish yuzasidan qatʼiy nazorat oʻrnatildi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?