Ravshan Ermatov FIFA hakamligi faoliyatini rasman yakunladi

10:30 27 Noyabr 2019 Sport
155 0

Ravshan Ermatov FIFA hakamligi faoliyatini rasman yakunladi, deb xabar berdi futbol eksperti Alisher Nikimbayev.

Qayd etilishicha, arbitrlik faoliyatini yakunlagan Ravshan Ermatov oldida yanada jiddiy vazifalar turibdi. Ulardan biri OFK hakamlar qoʻmitasi aʼzosi sifatida Osiyoda hakamlik sohasini rivojlantirishdir. OʻFAning birinchi vitse-prezidenti sifatida uning oldida turgan eng jiddiy va masʼuliyatli vazifa esa Oʻzbekistonda futbolni rivojlantirishdir.

Nikimbayev Ravshan Ermatovni boshqa referilardan prinsipialligi va qoidalarga qatʼiy rioya etish fazilatlari ajratib turgan. Endi ushbu sifatlar sobiq hakamimizga yurtimiz futbolini boshqarishda asqatadi.

Maʼlumot uchun, Ravshan Ermatov jahon chempionatlarida oʻyinlarni boshqarish boʻyicha jahon rekordini oʻrnatgan. U uchta mundialda 11 ta bahsga hakamlik qilgan. 2018-yil Rossiyada boʻlib oʻtgan JCHda u mazkur koʻrsatkichni yaxshilashi mumkin edi, ammo yordamchisi Abduhamidullo Rasulovning jarohati Ermatov jamoasi turnirni erta yakunlashiga olib kelgan edi. Hamyurtimizning hisobida, shuningdek, uchta Osiyo chempionati, klublar oʻrtasidagi jahon chempionati, Osiyo Chempionlar ligasi va Kubogidagi sanoqsiz oʻyinlar bor. Oʻzbekiston chempionatini-ku aytmasa ham boʻladi.


Izohlar

Hozircha hech kim fikr bildirmagan. Balki Siz birinchilardan bo'larsiz?