Qalb tug‘yoni

06:55 15 May 2018 Madaniyat
480 0

Vatan
Boshingda osmonu, qoshingda quyosh,
Tasviring chizolmay musavvir halak.
Shoir so‘z axtarib qotiradi bosh,
Buloqday qaynaydi oshufta yurak.

Parivash jamolin qiladi ko‘z-ko‘z,
Bag‘ringda barq urgan har gul, har qiyoq.
Faqat shoiringga yetishmaydi so‘z,
Faqat musavvvirga yetmaydi bo‘yoq.

Baxt
Charx urib gullagan bog‘dir sevgan dil,
Sevilgan qalb esa sehrli olam.
Ammo, baxtlilarning eng baxtlisidir
Ham sevgan, ham sevib, sevilgan odam.

Boboslari mard edi... 
— E, bu falonchining nabirasimi?
Bobosi mard edi, bag‘ri keng, o‘ktam.
Unisinikini… eslayolmadim,
Biz ham qarib-churub qoldik-da, bo‘tam.
Qarang, ketganiga yuz yil bo‘lsa ham
“Falonchi” bobomiz o‘lmagan edi.
“Unisi” dunyoni tark etganiga
Hali ikki yil ham bo‘lmagan edi…

Abdusaid Ko‘chimov


Izohlar

Hozircha hech kim fikr bildirmagan. Balki Siz birinchilardan bo'larsiz?