Prezident Shavkat Mirziyoyev Luvr muzeyida boʻldi

22:38 09 Oktyabr 2018 Siyosat
695 0

Prezident Shavkat Mirziyoyev Luvr muzeyiga tashrif buyurdi. Bu haqda Oʻzbekiston Prezidentining Matbuot xizmati xabar tarqatdi.

Dunyodagi eng mashhur muzeylardan biri boʻlmish Luvr Fransiyaning oʻziga xos “tashrif qogʻozi”dir. U badiiy kolleksiyasi boʻyicha jahonda birinchi, maydonining kattaligi boʻyicha ikkinchi oʻrinda turadi. Ushbu muzeyga har yili qariyb 10 million sayyoh tashrif buyuradi.

Muzey binosi 1190 yilda Fransiya qiroli Filippe Avguste tomonidan qalʼa sifatida bunyod etilgan. Luvr soʻzi mazkur mudofaa qoʻrgʻoni nomidan olingan. U bir necha asr davomida Fransiya qirollarining qarorgohi boʻlgan. Keyinchalik Versal saroyi qurilgach, 1793 yilda muzeyga aylantirilgan.

Luvr muzeyida eramizdan avvalgi 7 asrdan hozirgi davrgacha mansub boʻlgan 300 mingdan ziyod eksponat saqlanadi. Muzey zallarida ularning faqat 35 mingtasigina namoyish etiladi. “Miloslik Venera” haykali va Xammurapi qonunlari ustuni, Leonardo da Vinchining “Jokonda” va Yan Vermeyerning “Chevar qiz” kartinalari ular orasida eng mashhurlaridir.

Muzey eksponatlari 6 ta kolleksiyaga ajratilgan. Sharq kolleksiyasining oʻzi 24 ta zalni egallagan. U yerda mamlakatimiz tarixiga oid minglab ashyolar bor. Jumladan, Amir Temur bobomizning Qirol Sharl VIga yozgan maktubi, Ahmad Yassaviy maqbarasi uchun Sohibqiron yasattirgan shamdonlardan biri, qadimiy qurol-aslahalar, qabrtoshlardagi bitiklar va boshqa buyumlar buyuk oʻtmishdan soʻzlaydi.

Davlatimiz rahbari ushbu eksponatlarni tomosha qildi, ularning tarixi bilan qiziqdi. Oʻzbekiston va Fransiya muzeylari hamkorligida koʻrgazmalar tashkil etish, olimlar oʻrtasida ilmiy va madaniy aloqalarni kengaytirish zarurligini qayd etdi.


Izohlar

Hozircha hech kim fikr bildirmagan. Balki Siz birinchilardan bo'larsiz?