Prezident maktablari: yakuniy imtihon natijalari eʼlon qilindi

16:10 20 Avgust 2019 Jamiyat
3260 0

Joriy yilning 21-iyulidan 24-iyuliga qadar oʻtkazilgan yakuniy imtihon test sinovlarining natijalari Cambridge tashkiloti veb-saytida eʼlon qilindi:

Test natijalarini kompyuter ishlatgan holda ushbu havola orqali koʻrishingiz mumkin:

Ushbu koʻrsatilgan veb-saytga kirganingizdan soʻng:

1. Talabgor topshirgan hududini tanlang.

(Toshkent, Namangan, Xorazm va Qoraqalpogʻiston Respublikasi).

2. Soʻngra Prezident maktablariga topshirgan sinfini tanlang. (5-, 6-, 7-, 8-, 9-, 10-sinf).

3. Nomzodning natijasini bilish uchun qidirish tugmasini bosib (Ctrl+F), sizga taqdim etilgan 11 raqamlik maxsus identifikatsiya raqamini tering va Enter tugmasini bosing.

4. Yakuniy bosqich imtihonlaridan oʻtgan nomzodlar – jadvalning yuqori qismida koʻk rangda belgilangan boʻladi.

5. Yakuniy bosqich imtihonlaridan oʻta olmagan nomzodlar esa – oq rang bilan belgilangan boʻladi.

Eslatma: 5- va 6-sinflar uchun muammoni yechish va tanqidiy fikrlash boʻyicha umumiy 40 ballik savollar jami toʻplangan balning 80% hamda ingliz tilidan umumiy 50 ballik savollar jami toʻplangan balning 20% ini tashkil etadi.

Masalan, 5-sinf nomzodi tanqidiy fikrlash boʻyicha umumiy 40 ballik savollardan 21 tasiga toʻgʻri javob bergan va ingliz tilidan umumiy 50 ballik savolardan 39 tasiga toʻgʻri javob bergan boʻlsin. Bunda nomzodning jami toʻplagan bali quyidagicha hisoblanadi:

(21/40)*80 + (39/50)*20 = 57,6

Ushbu misolda nomzod muammoni yechish va tanqidiy fikrlash boʻyicha umumiy 42 ball va ingliz tilidan umumiy 15,6 ball toʻplagan, natijada nomzodning jami toʻplagan bali 57,6 ga teng boʻladi.

7-, 8-, 9- va 10-sinflar uchun muammoni yechish va tanqidiy fikrlash boʻyicha umumiy 40 ballik savollar jami toʻplangan balning 60% va ingliz tilidan umumiy 55 ballik savollar jami toʻplangan balning 40% ini tashkil etadi.

Oʻzbekiston Respublikasi Vazirlar Mahkamasining 2019-yil 25-iyun 526-sonli “Prezident maktablari toʻgʻrisidagi Nizom” qarorining 41-bandiga asosan, Prezident maktablariga kirish imtihonlari natijalarini tekshirish va talabgorlarning javoblari natijalarini baholash taʼlim sohasida faoliyat yurituvchi xorijiy tashkilot – Cambridge Assessment International Education tomonidan amalga oshiriladi. Natijalar anonim tarzda eʼlon qilinadi. Nomzodning shaxsiy maʼlumotlari koʻrsatilmaydi.

Shuningdek, Prezident maktablari nomzodlariga qoʻyiladigan talablar va qabul qilish tartibi boʻyicha maʼlumotlarni rasmiy veb-sayt orqali olishingiz mumkin.

5- va 7-sinflar kesimida yuqori ball toʻplagan oʻquvchilar boshqa ixtisoslashgan majtablarga imtihonsiz qabul qilinishi rejalashtirilgan.

Diqqat!

Prezident maktabiga qabul qilingan oʻquvchilarning ota-onalari uchun alohida uchrashuv tashkil etilib, maktabga hujjatlarni rasmiylashtirish va taʼlimga oid boshqa maʼlumotlar beriladi.

Uchrashuv oʻtkaziladigan sana va manzil Prezident maktablari va Xalq taʼlimi vazirligi rasmiy sayti orqali eʼlon qilinadi.

Maʼlumot uchun tel. 71 207 72 22


Izohlar

Hozircha hech kim fikr bildirmagan. Balki Siz birinchilardan bo'larsiz?