O‘zbekiston Respublikasi Prezidenti 2018 yil 17 aprel kuni o‘tkazgan yig‘ilishida soha mutasaddilari oldiga iqtisodiyot tarmoqlarida hisob-kitoblar tizimini takomillashtirish, debitor-kreditor hamda byudjetdan qarzdorliklarni qisqartish yuzasidan qator topshiriqlar bergan edi.

Mazkur topshiriqlar ijrosini ta’minlash maqsadida Toshkent viloyati Davlat soliq boshqarmasi tomonidan soliq qarzlarni sud hujjatlari asosida qisqartirish bo‘yicha Bosh prokuratura huzurida Majburiy ijro byurosi viloyati hududiy bo‘limi bilan hamkorlikda keng qamrovli tadbirlar tashkil etmoqda. Bu tadbirlarga ommaviy axborot vositalari xodimlarini jalb etilayotganligi ham o‘zining ijobiy ta’sirini ko‘rsatmoqda.

Piskent tumani davlat soliq inspeksiyasi xodimlari va tuman majburiy ijro byurosi bilan hamkorlikda tashkil etilgan tadbirda tumandagi “Abbos plyus Abdulaziz” mas’uliyati cheklangan jamiyatining 10,2 million so‘m va “Malohat Barno” korxonasining 2,5 million so‘m soliq qarzdorligi undirildi.

Ayrim fermer xo‘jaliklari esa to‘lov qobiliyatiga ega emaslar. Masalan, faoliyati bog‘bonchilikdan iborat bo‘lgan “Axrorov Abbosxon” fermer xo‘jaligining 16,4 million so‘m, yer maydoni 8,6 gektardan iborat bo‘lgan “Bobomurodov Suhrob” fermer xo‘jaligining 14,3 million so‘m soliq va majburiy to‘lovlardan qarzdorliklari bor. Mazkur fermer xo‘jaliklarning hisobidagi mol-mulki qarzdorlikni qoplash uchun yetarli bo‘lmaganligi uchun qarzdorlikni xo‘jalik rahbarining boshqa mulklardan undirish to‘g‘risida tushuntirish ishlari o‘tkazildi.

Tumanda joriy yilning iyun va iyul oylarida 24 ta yuridik shaxsning 236,0 million so‘m hamda 54 ta jismoniy shaxslarning 32 millon so‘m qarzdorliklari undirildi. 12 ta yuridik shaxsning 860 million so‘mlik hamda 2 ta jismoniy shaxsning 14 million so‘mlik mol-mulki xatlandi.

Bu kabi tadbirlar viloyatning barcha shahar va tumanlarida davom etmoqda.

Rahmatilla Sheraliyev, “Xalq so‘zi” muxbiri