Osiyo o‘yinlari. O‘zbekiston birinchi kunda 3ta medalga ega chiqdi

09:19 20 Avgust 2018 Sport
614 0
Foto: MOQ

19 avgust kuni Indoneziyaning Jakarta shahrida 18-Osiyo o‘yinlarining asosiy sport musobaqalariga start berildi.

Sportning 7 turida ishtirok etgan O‘zbekiston vakillari yakunda 3 medalga, 1 oltin va 2 bronzaga ega bo‘lishdi. Bu medallarning barchasi erkin kurash jamoasi a’zolari tomonidan keltirildi: Bekzod Abdurahmonov (74 kg) oltin medalni qo‘lga kiritgan bo‘lsa, Magomed Ibragimov (97 kg) va Sirojiddin Hasanov (65 kg) bronza medallarga sazovor bo‘lishdi.

Akademik eshkak eshish, suzish va qilichbozlik turlarida shu kuni o‘zbekistonlik sportchilar medallarni qo‘lga kirita olishmadi.

Tennischilar esa birinchi raunddan o‘tishdi - Oqgul Omonmurodova va Sanjar Fayziyev juftligi musobaqani g‘alaba bilan boshladi. O‘zbekistonlik tennischilar juftligi Shri-Lanka terma jamoasi a’zolari Dissanayaki/Kireraga qarshi kortga chiqib, 6:4, 6:3 hisobida zafar quchishdi.

Iroda To‘laganova va Farrux Do‘stovdan tarkib topgan aralash juftlik esa Xitoy Taypeyi tennischilari Chang/Xsiyex tandemiga mag‘lub bo‘lishdi - 1:6, 4:6.

Futbol bo‘yicha olimpiya terma jamoasi esa guruh bahsining uchinchi turida Tailand termasini 1:0 hisobida mag‘lub etdi va guruhda 100 foizlik natija qayd etgan holda nimchorak finalga yo‘l oldi.


Izohlar

Hozircha hech kim fikr bildirmagan. Balki Siz birinchilardan bo'larsiz?