Orfan va boshqa irsiy-genetik kasalliklarga chalingan bemorlar registri tashkil etiladi

12:01 09 Sentyabr 2019 Jamiyat
33 0

Kam uchraydigan (orfan) va boshqa irsiy-genetik kasalliklarga chalingan bolalarga tibbiy va ijtimoiy yordam koʻrsatishni yanada yaxshilash chora-tadbirlari toʻgʻrisida Prezident qarori qabul qilindi. Bu haqda “Huquqiy axborot” kanali xabar berdi.

Qaror bilan kam uchraydigan (orfan) va boshqa irsiy-genetik kasallikka chalingan bolalarga tibbiy va ijtimoiy yordam koʻrsatishning asosiy ustuvor yoʻnalishlari belgilandi.

Shuningdek, 2019–2024-yillarda ushbu bolalarga tibbiy va ijtimoiy yordam koʻrsatishni tashkil etish boʻyicha chora-tadbirlari dasturi tasdiqlandi.

Dasturga muvofiq koʻrsatilgan kasalliklarni bolalarda tashxislash va davolash uchun jami 424,6 mlrd soʻm va 548,0 ming yevro ajratiladi.

Qarorga koʻra orfan kasalliklarni davolashda ishlatiladigan tibbiy buyumlarni import qilish davlat roʻyxatidan oʻtkazilmasdan Sogʻliqni saqlash vazirligi tomonidan tasdiqlangan roʻyxat asosida amalga oshiriladi.

2020-yil 1-yanvarga qadar kam uchraydigan (orfan) va boshqa irsiy-genetik kasalliklarga chalingan bemorlarning Milliy registri tashkil etiladi.


Izohlar

Hozircha hech kim fikr bildirmagan. Balki Siz birinchilardan bo'larsiz?