Hindistonning yirik kompaniyasi Andijonda oʻz korxonasini tashkil etadi

22:38 17 Yanvar 2019 Iqtisodiyot
385 0

“XALQ SOʻZI ONLINE”. Saminjon Husanov/Andijon. Kuni kecha Prezidentimizning “Andijon-farm” erkin iqtisodiy zonasini tashkil etish toʻgʻrisida”gi Farmoni qabul qilindi. Unga koʻra, “Andijon-farm” EIZ respublikamizda yuqori texnologiyali farmatsevtika korxonalarini tashkil etish boʻyicha investitsiya loyihalarini amalga oshiradi. Buning uchun Hindiston Respublikasidan toʻgʻridan-toʻgʻri investitsiya jalb etiladi, mahalliy dorivor oʻsimliklar xom ashyosi qayta ishlanadi, natijada tibbiyot sohasi yuqori sifatli dori vositalari bilan taʼminlanadi.

Farmon ijrosini taʼminlash yuzasidan dastlabki ishlar boshlab yuborilgan. Jumladan, Andijon viloyati hokimi Shuhratbek Abdurahmonov ayni paytda Hindistonda xizmat safarida boʻlib turibdi va bugun ushbu mamlakatning 85 yillik tarixga ega boʻlgan “Taj Pharmaceuticals Limited” kompaniyasi bilan 10 million AQSH dollarilik kelishuvni imzoladi. Ushbu kompaniyada 450 dan ortiq turdagi dori mahsulotlari ishlab chiqariladi hamda dunyoning 30 dan ortiq davlatlariga eksport qilinadi.

Kompaniyaning Andijon viloyatidagi korxonasi tashkil etilishi farmatsevtika taraqqiyotiga, tibbiyotimizning yuqori sifatli dori vositalari bilan taʼminlanishiga, tabiiyki, yangi ish oʻrinlari yaratilishi va aholi daromadining oshishiga xizmat qiladi.


Izohlar

Hozircha hech kim fikr bildirmagan. Balki Siz birinchilardan bo'larsiz?