Hindiston matbuoti: “Oʻzbekiston — sammitning asosiy ishtirokchisi”

11:54 17 Yanvar 2019 Siyosat
394 0

Hindistondagi nufuzli ommaviy axborot vositalari “Joʻshqin Gujarat — 2019” IX xalqaro investitsiya sammiti va unda Oʻzbekiston Prezidenti Shavkat Mirziyoyevning ishtirokiga alohida eʼtibor qaratmoqda. Buni nashrlarda koʻplab materiallar eʼlon qilinayotgani misolida ham koʻrish mumkin.

Jumladan, ushbu mamlakatning yirik nashrlaridan biri — “The Hindu” gazetasida “Oʻzbekiston Prezidenti “Joʻshqin Gujarat” sammitining bosh mehmoni boʻladi” sarlavhali maqola eʼlon qilindi.

Unda aytilishicha, davlatimiz ­rahbari Markaziy Osiyo Prezidentlari orasida birinchilardan boʻlib, nufuzli mehmon sifatida ishtirok etyapti.

Gazeta Oʻzbekistonning Hindistondagi Favqulodda va muxtor elchisi Farhod Arziyevning tadbir boʻyicha intervyusini ham keltiradi:

“Prezidentimiz “Joʻshqin Gujarat” sammitiga hukumat darajasidagi va katta biznes delegatsiya bilan tashrif buyuryapti”, deydi elchi F. Arziyev.

Oʻzbekistonning yuqori darajadagi delegatsiyasi tarkibiga Investitsiyalar boʻyicha davlat qoʻmitasi, Tashqi savdo vazirligi, Savdo-sanoat palatasi, Tashqi ishlar vazirligi, shuningdek, 60 dan ortiq biznes tuzilmalari, yirik milliy va xususiy ­kompaniyalar rahbarlari ham kirgan.

Elchining soʻzlariga koʻra, bu ­Prezident Shavkat Mirziyoyevning soʻnggi toʻrt oy ichida Hindistonga amalga oshirayotgan ikkinchi tashrifidir. Oʻzbekiston yetakchisining 2018 yil oktyabr oyidagi davlat tashrifi ikki tomonlama munosabatlarda yangi sahifa ochdi. Ayni paytda savdo-iqtisodiy va sarmoyaviy hamkorlik kengaymoqda.

“Iqtisodiy sohani liberallashtirish, izchil siyosiy islohotlar va toʻgʻridan-toʻgʻri xorijiy sarmoyalarni jalb qilish Oʻzbekistonni biznes va investitsiyalar uchun jozibador mamlakatga aylantirmoqda”, deydi elchi.

Hind kompaniyalari Oʻzbekistonning farmatsevtika, toʻqimachilik, taʼlim, axborot texnologiyalari va turizm kabi sohalarda investitsiya imkoniyatlarini yuqori baholaydi.

“Gujarat — farmatsevtika sanoati markazi hisoblanib, bu yerda yetakchi kompaniyalar faoliyat yuritadi, — dedi shtatning bosh kotibi J. N. Singx. — Oʻzbekistondagi yangilanishlar kompaniyalarimizga oʻz ­faoliyat qamrovini kengaytirishga imkon beryapti. Farmatsevtika sohasiga investitsiyalarni jalb etish maqsadida Andijon viloyatida erkin farmatsevtika zonasi tashkil qilinmoqda. ­Natijada Gujarat va Andijon oʻrtasidagi hamkorlik mustahkamlanayotir”.

Yana bir yirik iqtisodiy nashr — “The Economic Times” gazetasi “Hindiston Bosh vaziri Gujarat sammitida Oʻzbekiston Prezidentini kutmoqda” sarlavhali maqola chop etdi.

Uning muallifi Dipanjan Roy ­Chaudxurining taʼkidlashicha, farmatsevtika tarmogʻiga investitsiyalarni jalb qilish uchun Andijon viloyatida “Andijon-farm” erkin iqtisodiy ­zonasi tashkil etilmoqda. Bu ayni paytda Gujarat kompaniyalari uchun farmatsevtika, toʻqimachilik va boshqa sohalarda biznesni rivojlantirish uchun yangi imkoniyatlar eshigini ochadi.

Gujaratdagi koʻrgazmada Oʻzbekiston paviloni keng koʻlam va rang-baranglik kasb etadi. Chunonchi, avtomobilsozlik, metallurgiya, farmatsevtika, qurilish, IT, bank, toʻqimachilik, oziq-ovqat sanoati, turizm, taʼlim va bosh­qa sohalar namoyishi ishtirokchilarda katta qiziqish uygʻotishi, shubhasiz.

Anvar MIRZAYEV (“Xalq soʻzi”) tayyorladi.


Izohlar

Hozircha hech kim fikr bildirmagan. Balki Siz birinchilardan bo'larsiz?