Hey, qachon uygʻongaysan? (Jurnalist doʻstlarimga)

16:45 11 Yanvar 2019 Madaniyat
444 0

Abdusaid Koʻchimov

Eh!.. Bugun yosh bola ham senga kulib qaraydi,
Amaldor qoshin kerib, masxaralab yayraydi,
Vazir ogʻam xeshlarin tinmay tezlab, qayraydi —
Sorlochin, sorburgutdek koʻzing qayoqda qoldi,
Shamshir tigʻidek keskir soʻzing qayoqda qoldi?

Nega qalam sanchmaysan loʻttivozning tiliga,
Qachon kishan boʻlgaysan poraxoʻrning qoʻliga,
Qoyadek turmaysanmi korrupsiya yoʻlida —
Sorlochin, sorburgutdek koʻzing qayoqda qoldi,
Shamshir tigʻidek keskir soʻzing qayoqda qoldi?

Ne bois chiqmas sasing, duch kelganda olchoqqa,
Razilni koʻrgan chogʻing aylanmaysan sirtmoqqa,
Qachon kuyib-yongaysan, aylangaysan chaqmoqqa, —
Sorlochin, sorburgutdek koʻzing qayoqda qoldi,
Shamshir tigʻidek keskir soʻzing qayoqda qoldi?

Jurnalist degan, axir, el gʻamini yemasmi,
Gʻururing shuncha vayron, nargaying shuncha pastmi,
Davlatboshim daʼvati, senga daʼvat emasmi —
Sorlochin, sorburgutdek koʻzing qayoqda qoldi,
Shamshir tigʻidek keskir soʻzing qayoqda qoldi?


Duvuring qani sening, oriyat-oring qani,
Mardona jasoratni kutmoqda-ku Vataning,
Qachon qaddin koʻrsatgay qadimiy sharaf-shoning —
Sorlochin, sorburgutdek koʻzing qayoqda qoldi,
Shamshir tigʻidek keskir soʻzing qayoqda qoldi?


Haqsizlikni koʻrganda ne bois choʻgʻlanmaysan,
Sherdek tortib naʼralar, ajdarday toʻlgʻanmaysan,
Qachongacha mudraysan, hey, nega uygʻonmaysan —
Sorlochin, sorburgutday koʻzing qayoqda qoldi,
Shamshir tigʻidek keskir soʻzing qayoqda qoldi?

Adolat vaqti keldi — adolatni yoz endi,
Haqiqatni qanchalar eʼzozlasang oz endi,
Haqqi kalom qoʻrgʻoni muqaddas, mumtoz endi —
Sorlochin, sorburgutdek koʻzing qayoqda qoldi,
Shamshir tigʻidek keskir soʻzing qayoqda qoldi?

Qachongacha shaʼningni sargʻaytib, soʻldirgaysan,
Ichingdagi qoʻrquvni ayt, qachon oʻldirgaysan,
Qachon qalb qoʻrgʻoningni jurʼatga toʻldirgaysan, —
Sorlochin, sorburgutdek koʻzing qayoqda qoldi,
Shamshir tigʻidek keskir soʻzing qayoqda qoldi?

Qutlugʻ yoʻldan bormoqda ona yurt, ona xalqing,
Xudbindir bu zamonda gar yonmasa kimda-kim,
Ey, sohibi qalamlar, ummonday joʻshing, qalqing —
Sorlochin, sorburgutdek koʻzing qayoqda qoldi,
Shamshir tigʻidek keskir soʻzing qayoqda qoldi?

Men ham sizga qavmman, ich-etimni yegayman,
Qachongacha maydakash kaslarga bosh egay man,
Bugun yoqamni tutib, oʻz-oʻzimga degayman:
— Sorlochin, sorburgutdek, koʻzing qayoqda qoldi,
— Shamshir tigʻidek keskir, soʻzing qayoqda qoldi?!


Izohlar

Hozircha hech kim fikr bildirmagan. Balki Siz birinchilardan bo'larsiz?


Ko‘p o‘qilganlar

Afisha

Matyoqub Matchonov: “Oltindek qimmatli, Humo qushi singari sarbaland...”

Xoʻsh, bu qanday anjuman oʻzi? Uni oʻtkazishdan koʻzlangan maqsad nima? Kelgusida mazkur kinotaqdimot kino olami va olam kinosi ichra oʻz oʻrnini topib keta oladimi yoki salaflari kabi yoʻqlikka yuz tutadimi (zakiy oʻquvchi nima demoqchi ekanimizni tushunganiga shubha yoʻq, albatta)?

23 Yanvar 2019