Fransiya matbuoti: “2018 yil dunyo tarixida Oʻzbekiston Prezidenti Shavkat Mirziyoyev nomi bilan qoladi”

10:09 08 Oktyabr 2018 Siyosat
1285 0
Foto: Oʻzbekiston Respublikasi Prezidentining Matbuot xizmati.

Fransiya matbuotida yurtimiz, uning tarixi, madaniyati va zamonaviy taraqqiyoti haqida hikoya qiluvchi materiallarga keng oʻrin berilmoqda.

Xususan, “France 24” telekanali “oʻzbek diplomatiyasi”ning soʻnggi vaqtda sezilarli darajada faollashgani, respublika qoʻshni mamlakatlar, yetakchi xorij davlatlari bilan aloqalarni mustahkamlab borayotgani va bu uning xalqaro maydondagi mavqei yuksalishiga xizmat qilayotganini eʼtirof etdi.

“Oʻzbekiston rahbariyati davlat va jamiyat hayotining barcha sohasini isloh qilishga intilmoqda. Bundan tashqari, xorijliklar uchun viza tartibi yengillashtirildi, milliy iqtisodiyotni diversifikatsiya qilish boʻyicha chora-tadbirlar amalga oshirilayotir”, deyiladi telekanalda.

Joriy yilning sentyabr oyida Moʻynoqda boʻlib oʻtgan birinchi Elektron musiqa festivali ham “France 24” eʼtiboridan chetda qolmadi. Madaniy tadbirning Orol dengizining qurigan hududida oʻtkazilgani nihoyatda dolzarb ushbu ekologik halokatga xalqaro hamjamiyat eʼtiborini tortishga turtki beradi. “Orol yana toʻlmoqda. U ohanglar ummoni bilan toʻlmoqda, — deb yozadi muxbirlar. — Shu bilan birga, mazkur muammoning salbiy oqibatlari allaqachon Oʻzbekiston chegarasidan tashqariga chiqqan boʻlib, dunyo hamjamiyatining oʻzaro kelishilgan saʼy-harakatlarini talab qiladi”.

“Le Monde” gazetasi rasmiy Toshkentning Afgʻoniston boʻyicha yangilangan siyosatini yuqori baholaydi. Oʻzbekiston afgʻon hukumati va “Tolibon” oʻrtasida toʻgʻridan-toʻgʻri tinch muzokaralar oʻtkazilishi tarafdori boʻlibgina qolmay, buning uchun sharoit yaratib berishga ham tayyordir. Toshkentning ushbu masala borasidagi pozitsiyasi dunyoning koʻplab davlatlari tomonidan olqishlanmoqda va qoʻllab-quvvatlanyapti.

“Le Monde” oʻlkamizda madaniyat obidalarini asrab-avaylash, maʼrifiy islom gʻoyalarini targʻib qilish, muqaddas qadamjolarni obodonlashtirish boʻyicha amalga oshirilayotgan ishlarni ijobiy baholaydi. Davlatimiz rahbarining Oʻzbekistonda Imom Buxoriy nomidagi xalqaro ilmiy-tadqiqot markazi, Islom sivilizatsiyasi markazi hamda Xalqaro islom akademiyasini tashkil etish borasidagi tashabbuslariga nihoyatda muhim qarorlar, deya tavsif beriladi.

“Courrier International” haftalik gazetasida taʼkidlanishicha, “2018 yil dunyo tarixida Oʻzbekiston Prezidenti Shavkat Mirziyoyev nomi bilan qoladi. Aynan uning saʼy-harakatlari tufayli Markaziy Osiyo mamlakatlari oʻzaro eʼtirozlar va ishonchsizlikni yengib oʻtib, uzoq yillardan keyin ilk bor Ostona shahrida mintaqaviy sammit oʻtkazishdi. Oʻzbekiston rahbari qisqa muddatda barcha qoʻshnilar bilan aloqalarni yoʻlga qoʻya oldi”.

Mamlakat ichki hayotida ham muhim oʻzgarishlar sodir boʻldi. Shavkat Mirziyoyev boshlagan islohotlar kuzatuvchilar tomonidan liberallashuv, qayta fikrlash va iliqlik singari tushunchalar bilan eʼtirof etilmoqda. Ushbu jarayonda respublika ichki barqarorlikni saqlab qolayotgani eʼtiborga molikdir. “Tadbirkorlarga valyutadagi daromadlarni topshirmaslikka ruxsat berildi. Koʻplab cheklovlar bekor qilindi... Paxta dalalari maydoni kamayib, ularning oʻrniga oziq-ovqat ekinlari ekilmoqda. Biznes uchun yangi imkoniyatlar ochilayotir”, deb yozadi jurnalistlar.

“Skyscanner” sayyohlik jurnalida “har qanday sayyohni hayratda qoldiradigan shahar” — poytaxt Toshkent haqida katta reportaj chop etildi.

Shahar boʻylab sayohatni uning bozorlaridan boshlagan maʼqul, deydi muxbirlar. Masalan, Chorsu bozori oʻzbek madaniyatini tushunish va unga “singib ketish” imkonini beradi.

“Chorsuda mahalliy urf-odat va anʼanalar xilma xilligini koʻrish mumkin. Umuman olganda, oʻzbekona bozor shunday joyki, bu yerda sizning his-tuygʻularingiz harakatga aylanib, koʻzingizga tushgan hamma narsani sotib olishni istaysiz”, deyiladi “Skyscanner”da.

Toshkent muzeylari oʻziga xos tarixga ega. Ularning har biri oʻlka oʻtmishi haqida soʻzlaydi. Masalan, Oʻzbekiston tarixi Davlat muzeyida boʻlsangiz, oʻzbek zaminida ilk odamlar paydo boʻlgan davrlarga “sayohat” qilishingiz mumkin. Toʻrt qavatdan iborat maskanda eksponatlar juda noyobligi bilan mashhur.

“Toshkent sayyohlarni oʻzining beqiyos muhiti, uy-joy va transportning arzon narxlari, mazali taomlari, goʻzal metropoliteni va keng bogʻlari bilan ohanrabodek tortadi. Agar hali bu yerda boʻlmagan boʻlsangiz, albatta, Toshkentga boring! Afsus qilmaysiz!”, deya oʻquvchilarga murojaat etadi “Skyscanner”.
Anvar MIRZAYEV
(“Xalq soʻzi”) tayyorladi.


Izohlar

Hozircha hech kim fikr bildirmagan. Balki Siz birinchilardan bo'larsiz?