Avval xabar berilganidek, Germaniya Federativ Respublikasi Federal Prezidenti Frank-Valter Shtaynmayer rasmiy tashrif bilan mamlakatimizda boʻlib turibdi.

Oliy martabali mehmon 29-may kuni Urganch davlat universiteti professor-oʻqituvchilari va talabalari bilan uchrashdi, deb yozmoqda OʻzA.

Mazkur universitet mamlakatimizdagi yirik bilim maskanlaridan biri boʻlib, undagi 10 fakultetda 47 ta taʼlim yoʻnalishida 13 mingga yaqin talaba va magistr taʼlim olmoqda. Oliy taʼlim muassasasida xorijiy davlatlardan kelgan 1 ming 192 nafar talaba tahsil olmoqda. Universitet oʻqituvchi va professorlarining soni 654 nafarni tashkil etadi.

Germaniya Federativ Respublikasi Federal Prezidenti Frank-Valter Shtaynmayer universitet professor-oʻqituvchilari va talabalari bilan suhbatda boʻldi. Qizgʻin savol javoblarga boy oʻtgan uchrashuvda Oʻzbekistonda taʼlim tizimiga qaratilayotgan eʼtibor, yoshlarning jahon andozalari darajasida zamonaviy bilim va kasb-hunarlarni egallashi, jismonan va maʼnan yetuk insonlar boʻlib ulgʻayishi, ularning qobiliyat va isteʼdodini, intellektual salohiyatini yuzaga chiqarish, yosh avlod qalbida Vatanga sadoqat va fidoyilik tuygʻularini yuksaltirish borasida ulkan ishlar amalga oshirilayotgani qayd etildi.

– Yoshlari jamiyat hayotida faol boʻlgan davlat albatta rivojlanadi, – dedi Frank-Valter Shtaynmayer. – Oʻzbekiston yoshlarni koʻrib, ushbu mamlakat haqida ham shu fikrni aniq ayta olaman. Bu yerda oʻtirgan yoshlar bilan nafaqat oʻzbek xalqi balki biz ham faxrlansak arziydi. Chunki, ular muloqot jarayonida sof nemis tilida grammatik va fonetik xatolarsiz gapiryapti. Oʻz fikrini ravon ifoda qilmoqda.

Ochiq muloqot tarzida oʻtgan davra suhbatida yoshlar Germaniya Federativ Respublikasi, nemis yoshlari hayotiga oid savollarga Federal Prezident va u boshchiligidagi delegatsiya aʼzolaridan atroflicha javob oldi.