Ertaga Shahram G‘iyosov jiddiy raqibga qarshi ringga chiqadi

16:51 14 Iyul 2018 Sport
904 0
Foto: MOQ

Ertaga, 15 iyul kuni tongda bir yo‘la uch nafar professional bokschimiz Amerika Qo‘shma Shtatlarida o‘zlarining navbatdagi janglarini o‘tkazadilar.

MOQ matbuot xizmati xabariga ko‘ra, Olimpiya o‘yinlari chempioni Fazliddin G‘oibnazarov mezbon bokschi Kevin Jonsonga qarshi ringga ko‘tariladi. Taqqoslash uchun Fazliddin shu kungacha prof ringda to‘rtta jang o‘tkazib, ularning barchasida g‘alaba qozongan (2 tasida nokaut). Uning raqibi esa beshta jang o‘tkazib, barchasida raqiblarini mag‘lub etgan (4 tasida nokaut).

Jahon chempioni, Olimpiya o‘yinlari finalchisi Shahram G‘iyosov meksikalik Daniel Echeverriyaga qarshi jang o‘tkazadi. Shahram prof ringda 2 ta jang o‘tkazib, ularning har ikkisida g‘alaba qozongan (1 ta nokaut). Meksikalik bokschi esa 24 ta jang o‘tkazib, ularning 19 tasida g‘alaba qozongan (17 tasi nokaut). 5 ta jangda mag‘lubiyatga uchragan (2 tasi nokaut).

Olimpiya o‘yinlari va jahon chempionati sovrindori Murodjon Ahmadaliyevga esa argentinalik Luis Fernando Molina raqiblik qiladi. Ahmadaliyev bungacha ikki marotaba jang o‘tkazib, ularning ikkalasida ham raqiblarini nokaut evaziga mag‘lubiyatga uchratgan. Molina esa 12 ta jang o‘tkazgan. Shu janglarning 7 tasida u raqiblarini mag‘lub etgan (2 tasida nokaut). 4 ta jangda esa imkoniyatni boy bergan. Bitta jangda durang qayd etgan.

Bugun bokschilarimiz jang oldidan vazn o‘lchash marosimlarida ishtirok etishdi.


Izohlar

Hozircha hech kim fikr bildirmagan. Balki Siz birinchilardan bo'larsiz?