Eng yaxshi sovgʻa - kitobdir

11:09 28 Mart 2019 Jamiyat
586 0

Davlatimiz rahbari Shavkat Mirziyoyev joriy yilning 19 mart kunidagi yigʻilishda aholi, ayniqsa, yoshlar maʼnaviyatini yuksaltirish masalasiga alohida toʻxtalib, “Har bir rahbar oʻzining shaxsiy kutubxonasidan oʻzi taʼlim olgan maktab kutubxonasiga kitoblar sovgʻa qilsa, bu yaxshi tashabbus boʻlib kitobxonlikni rivojlantirish bilan farzandlarimiz tarbiyasiga ijobiy taʼsir koʻrsatadi”, deb taʼkidladi.

Prezidentimizning bu tashabbuslari respublikamizdagi vazirlik va tashkilotlar rahbarlari, keng jamoatchilik tomonidan katta ishtiyoq bilan kutib olindi. 27 mart kuni Oʻzbekiston Respublikasi Vazirlar Mahkamasi huzuridagi millatlararo munosabatlar va xorijiy mamlakatlar bilan doʻstlik aloqalari qoʻmitasi raisi Rustambek Qurbonov oʻzlari taʼlim olgan poytaxtimizdagi 17- umumiy oʻrta taʼlim maktabida boʻlib, maktab uchun oʻz shaxsiy kutubxonasidan 50dan ortiq kitoblar sovgʻa qildi. Bu haqda qoʻmita matbuot xizmati xabar berdi.

Maktab rahbariyati va oʻqituvchilari bilan boʻlgan uchrashuv chogʻida maktabning sobiq oʻquvchisi R.Qurbonov oʻzi oʻqigan davrni, taʼlim bergan murabbiy oʻqituvchilarni hurmat bilan tilga oldi, oʻsha davrlardagi qiziqarli voqealarni gapirib berdi.

Maktab maʼmuriyati sovgʻalar uchun chuqur minnatdorchilik bildirdi, qilingan muruvvat yoshlar maʼnaviyatini yuksaltirish, ular oʻrtasida kitobxonlikni keng targʻib qilishga katta turtki boʻlishini taʼkidlab, maktabni bitirib ketgan va yurtimiz ravnaqiga katta hissa qoʻshgan sobiq oʻquvchilar bilan muntazam ravishda uchrashuvlar tashkil qilishga kelishib olindi.


Izohlar

Hozircha hech kim fikr bildirmagan. Balki Siz birinchilardan bo'larsiz?