DXX sobiq raisi Ixtiyor Abdullayev va uning sheriklariga jazo belgilandi

16:24 27 Sentyabr 2019 Siyosat
1233 0

Bugun, 2019-yil 27-sentyabr kuni Oʻzbekiston Respublikasi Harbiy sudi tomonidan Oʻzbekiston Respublikasi Davlat xavfsizligi xizmatining (DXX) sobiq raisi Ixtiyor Abdullayev va u tomonidan tashkil etilgan jinoiy uyushma aʼzolariga nisbatan ayblov hukmi eʼlon qilindi. Bu haqda Oliy sud matbuot xizmati xabar berdi.

Ikki oydan ortiq davom etgan yopiq sud majlisida sudlanuvchilarning, uch yuzdan ortiq jabrlanuvchi va guvohlarning koʻrsatmalari tinglanib tahlil qilindi, dastlabki tergov organi tomonidan toʻplangan dalillarga baho berilib, sudlanuvchilarning vajlari tekshirildi.

Natijada, Ixtiyor Abdullayev jinoiy uyushma tashkil etib, mansab vakolatini suiisteʼmol qilib, uyushgan guruh va jinoiy uyushma manfaatlarini koʻzlab, juda koʻp miqdorda pora olish, Oʻzbekiston Respublikasining manfaatlariga xilof ravishda bitimlar tuzish, tovlamachilik, oʻzlashtirish yoʻli bilan talon-toroj qilish, bojxona toʻgʻrisidagi qonun hujjatlarini buzish va shu kabi bir qator jinoyatlarni sodir etganlikda aybli deb topilib, jinoyatlar majmui tariqasida 18 yil muddatga ozodlikdan mahrum qilish jazosiga hukm qilindi.

Shuningdek, sudning hukmi bilan: DXX raisining sobiq oʻrinbosari Jahongir Igamov 16 yil, DXX raisining sobiq maslahatchisi Alisher Ishanxodjayev 17 yil, Toshkent shahar prokurorining sobiq oʻrinbosari Yorkin Abdullayev 14 yil, Adliya vazirligi Kadrlar bilan ishlash boshqarmasi boshligʻining sobiq oʻrinbosari Yusufboy Xodjayev 8 yil, Bosh prokurorning sobiq oʻrinbosari Gʻayrat Xidoyatov 5 yil, Oliy sud raisining sobiq oʻrinbosari Baxodir Dehqonov 5 yil, Namangan viloyatining sobiq prokurori Ulugʻbek Toshev 5 yil ozodlikdan mahrum qilish jazosiga sudlanib, har biri muayyan muddatga mansabdorlik va moddiy javobgarlik bilan bogʻliq lavozimlarda ishlash huquqidan mahrum qilindilar.

Qolgan 15 nafar sudlanuvchilarga ham sodir etilgan jinoyatlarning ogʻirlilik va ijtimoiy xavflilik darajasi hamda ularning jinoyatlardagi ishtirokidan kelib chiqib, jazolar tayinlandi.

Bundan tashqari, sud tomonidan jinoyatlar oqibatida davlat, shuningdek yuridik va jismoniy shaxslarning manfaatlariga yetkazilgan moddiy zararlarni qoplashga qaratilgan tegishli choralar belgilandi.


Izohlar

Hozircha hech kim fikr bildirmagan. Balki Siz birinchilardan bo'larsiz?