Bunyodkor va Kichik halqa yo‘li kesishmasidagi ko‘prik nima uchun ta’mirlanayotgani izohlandi

13:15 24 Iyul 2018 Jamiyat
316 0
Arxiv foto

Toshkent shahridagi Bunyodkor va Kichik halqa yo‘li ko‘chalari kesishmasidagi ko‘prik ta’mirlanmoqda.

Ushbu inshootni ta’mirlash ishlari “O‘zbekiston temir yo‘llari” aksiyadorlik jamiyatiga qarashli “Ko‘prikqurilish” tresti unitar korxonasi tomonidan olib borilmoqda.

Jamiyat matbuot xizmatidan xabar berishlaricha, ushbu yo‘l o‘tkazgich Prezidentimizning shu yil 29 martdagi tegishli qaroriga muvofiq, modernizatsiya qilinayotgan bo‘lib, u tez orada butunlay yangicha qiyofa kasb etadi.

Ayni paytda bu yerda ko‘priksozlar tomonidan yo‘l o‘tkazgichning tayanch qismlari va oraliq to‘sinlari ta’mirlanib, yoritish tizimlari, xizmat ko‘rsatish yo‘lakchalari va tashqi ko‘rinishi yangilanyapti. Inshootning texnik holati esa muhandis va mutaxassislarning doimiy nazorati ostida. Shu bois mazkur chorrahada avtomobillar harakati cheklangan.

Yo‘l o‘tkazgich yaqin kunlar ichida foydalanishga topshirilishi kutilmoqda.


Izohlar

Hozircha hech kim fikr bildirmagan. Balki Siz birinchilardan bo'larsiz?