Bundan buyon ovchi qushlarga ham pasport beriladi

18:09 28 Avgust 2018 Dunyo
175 0

Bundan buyon Qirgʻizistonda ovchi qushlar egalari oʻz jonivorlariga chip oʻrnatish va ular uchun pasport(identifikatsiya kartasi) yuritishga majbur boʻladi. Bu haqda 24.kg xabar berdi.

Mamlakat atrof muhit va oʻrmon xoʻjaligi davlat agentligi direktori tomonidan shu boʻyicha buyruq chiqarilgan. Ayni paytda chip va hujjatlarni ishlab chiqish hamda tayyorlash boʻyicha tanlov eʼlon qilingan. Shunday qilib kelgusida chipsiz va pasportsiz ovchi qushlarni Qirgʻizistondan olib chiqib ketish yoki u yerga olib kirish taqiqlanadi, qolaversa, musobaqalarga qoʻyilmaydi.

Bundan oldin ovchi yirtqich qushlarni saqlash va ulardan foydalanish qoidalari tasdiqlangandi. Unga koʻra davlat ekologik ekspertizasi ruxsatini olgan shaxslargina ana shunday huquqqa ega hisoblanadi. Barcha qushlar maxsus jurnalga kiritiladi. Roʻyxatdan oʻtkazilmagani musodara qilinadi.

Boquvchi har bir qushni uch metrga toʻrt metrlik va balandligi uch metrlik atrofi oʻralgan joy, tegana, suvdon, qoʻnoq bilan taʼminlashi kerak. Qush boqiladigan joy tozaligiga qatʼiy rioya etilishi, havo aylanish va drenaj kanali tizimi oʻrnatilishi lozim. U yerda havo harorati Selsiy boʻyicha 25 darajadan yuqori boʻlmasligi, 15 darajadan past boʻlmasligi ham belgilab qoʻyilgan.

Qolaversa, ov paytida qushlarning quvvatini oshiruvchi, aslida ularning sogʻligiga zarar yetkazuvchi preparat(doping kabi)lardan foydalanish ham taqiqlandi. Egasi ovga yaroqsiz qushlar taqdirini davlat mutasaddilari bilan hal etishi lozim. Bu borada uchta yoʻl bor – tabiat qoʻyniga qoʻyib yuborish, reabilitatsiya markaziga joʻnatish yoki hayvonot bogʻiga berish.

Hisob-kitoblarga koʻra, ayni paytda Qirgʻizistonda 200ga yaqin kishi yirtqich qushlarni boqadi.


Izohlar

Hozircha hech kim fikr bildirmagan. Balki Siz birinchilardan bo'larsiz?