Xitoy vakili Syuy Dunyuy BMTning Oziq-ovqat va qishloq xoʻjaligi tashkiloti (FAO)ning yangi bosh direktori etib saylandi. FAOning Bosh qarorgohida oʻtkazilgan navbatdagi saylovda Oʻzbekiston delegatsiyasi ham ishtirok etmoqda.

Qishloq xoʻjaligi vazirligi matbuot xizmatidan xabar qilishicha, avval Xitoyning qishloq xoʻjaligi vazirining oʻrinbosari lavozimida ishlagan Syuy Dunyuy birinchi turda yashirin ovoz berish yoʻli bilan saylanib, 191 ovozdan 108 ovoz olishga erishdi.

FAOning yangi bosh direktori Syuy Dunyuy 2011-yildan beri tashkilotni boshqarib kelayotgan braziliyalik Xose Graziano da Silvaning oʻrnini egallaydi. U shu yilning 1-avgustidan oʻz vazifasini bajarishga kirishadi.

FAO ning 1945-yilda tashkil etilganidan shu vaqtga qadar uning bosh direktorlari Buyuk Britaniya, Amerika Qoʻshma Shtatlari (ikki marta), Hindiston, Niderlandiya, Livan, Senegal va Braziliyadan saylangan.

Oʻzbekiston FAOga 2001-yilda aʼzo boʻlgan. 2014-yilda FAOning Oʻzbekistondagi vakolatxonasi ochilishi va sheriklik toʻgʻrisidagi yangi kelishuv imzolanishi bilan mazkur hamkorlik yangi bosqichga koʻtarildi.