Endi yengil avtomobillarni 30 kunga notarial tasdiqlashsiz ijaraga olish mumkin

11:40 27 Iyul 2018 Jamiyat
566 0
Illyustrativ foto

Endi yengil avtomobillar va mototransport vositalarini 30 kunga ijaraga berishni notarial tasdiqlash talab etilmaydi.

Bu O‘zbekiston Respublikasi Prezidenti tomonidan joriy yilning 26 iyul kuni imzolangan “Iqtisodiyotning jadal rivojlanishini ta’minlashga doir qo‘shimcha chora-tadbirlar qabul qilinishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘zbekiston Respublikasi Qonunida o‘z ifodasini topdi.

Mazkur hujjat bilan bir qator qonunlarga o‘zgartirish va qo‘shimchalar kiritildi.

Xususan, Fuqarolik kodeksiga kiritilgan o‘zgartirishga muvofiq endilikda avtomototransport vositalarini o‘ttiz kungacha bo‘lgan muddatga ijaraga berish shartnomalarini notarial tasdiqlash shart emas.

Yengil avtomobillar va mototransport vositalarini ijaraga berish bo‘yicha xizmat ko‘rsatadigan yuridik shaxslar jismoniy shaxslar bilan yengil avtomobillar va mototransport vositalarini o‘ttiz kungacha bo‘lgan muddatga ijaraga berish shartnomalarini oddiy yozma shaklda tuzishlari mumkin.

Mazkur o‘zgartirish Adliya vazirligi tomonidan ijara bozorini rivojlantirish, jumladan, ichki va tashqi turistlar uchun avtomobil turizmini ustuvor rivojlantirish va ularga qo‘shimcha qulayliklar yaratish maqsadida taklif etilgan edi.


Izohlar

Hozircha hech kim fikr bildirmagan. Balki Siz birinchilardan bo'larsiz?