Apple brendiga tegishli mahsulotlar AQSHning qo‘shimcha 10 foizlik bojlar kiritilgan Xitoy tovarlari ro‘yxatiga tushib qolishi mumkin. Bundan tashqari, uning alohida qurilmalari narxi sezilarli darajada oshishi kutilyapti.

Financial Times nashrida yozilishicha, Apple kompaniyasining iPhone smarftonlari va Mac kompyuterlariga nisbatan bunday xatar yo‘q. Lekin Apple Watch soatlari, HomePod kolonkalari va AirPods quloqchinlari qo‘shimcha soliq solinishi mumkin bo‘lgan boshqa gadjetlar orasidan joy olishi ehtimoli bor. Bojlar esa ularning bozordagi qiymati qimmatlashuviga ham olib keladi.

Nega endi AQSH qo‘llayotgan bojlarga AQSHga tegishli brend tushyapti dersiz?

Sababi Apple mahsulotlari Chin o‘lkasidagi zavodlarda Xitoy ehtiyot qismlaridan yig‘iladi.

Mustaqil ekspertlarning fikricha, Apple yaqin orada bojlar o‘rnini qoplash uchun AQSHdagi narxlarini oshirishga majbur bo‘ladi yoki daromadlar bo‘yicha ko‘rsatkichlari duch keladigan zarbani qabul qilib oladi.

Financial Times manbasida qayd etilishicha, AQSH savdo vazirligi tomonidan yangi cheklov bojlari bo‘yicha tayyorlangan ro‘yxatga o‘z ishlab chiqarishini Xitoyda yo‘lga qo‘ygan Amerikaning boshqa kompaniyalari ham tushishi mumkin. Amazon’s Echo va Google Home aqlli kolonkalari, Sonos elektronika va akustika vositalari shular jumlasidandir.