Amerika ertak va afsonalari oʻzbek tilida chop etildi

16:06 04 Dekabr 2019 Madaniyat
373 0

AQSHning Toshkentdagi elchixonasi oʻzbekistonlik hamkorlari bilan “Amerika ertak va afsonalari” kitobini oʻzbek tilida chop ettirdi. Rangli rasmlar bilan bezatilgan ushbu kitobga hayvonlar, qushlar va koʻplab boshqa qiziqarli personajlar haqidagi 60 dan ortiq kichik hikoyalar kiritilgan boʻlib, ular www.americanfolklore.net saytidan olingan. Kitob Toshkentdagi “Baktria Press” nashriyotida bosildi. Bu haqda elchixona matbuot xizmati xabar berdi.

“Oʻzbekistonda kitob oʻqish madaniyati, xususan yoshlar orasida, ommalashtirish boʻyicha qator saʼy-harakatlar qilinmoqda. Koʻp kishilar Ernest Xeminguey, Teodor Drayzer, Mark Tven kabi amerikalik klassiklar va ularning asarlari bilan tanish boʻlsa-da, yosh kitobxonlar Amerika adabiyotidan unchalik xabardor emas. Ushbu kitobni bevosita ingliz tilidan tarjima qilgan holda chop ettirish orqali AQSH elchixonasi yosh oʻquvchilar uchun moʻljallangan kitoblar nashrini rivojlantirishga oʻz hissasini qoʻshishdan mamnundir”, deyiladi xabarda. 

“Amerika ertak va afsonalari” Oʻzbekistondagi kutubxonalar va maktablarga tarqatiladi. Uni Toshkentdagi Amerika markazi va Milliy kutubxonada joylashgan “AQSHga daricha” xonasidan ham topish mumkin. Elchi Daniel Rozenblyum va amerikalik ingliz tili oʻqituvchilari bu kitobni talaba va oʻquvchilar davrasida oʻqib, kitob, adabiyot va mutolaaning ahamiyati xususida suhbatlashadi.

Ushbu kitob AQSH elchixonasi avvalroq oʻzbek tilida nashr ettirgan “Amerika hikoyalari”, "Oʻzbekistonning ikki rivoyati” va “Raqqosa Ayiqxonim” kitoblari qatoriga qoʻshildi.


Izohlar

Hozircha hech kim fikr bildirmagan. Balki Siz birinchilardan bo'larsiz?