Liviya milliy armiyasi harbiylari “Al-Qoida” terrorchilik guruhi yetakchilaridan biri Abu Sofiyon bin Kamuni asirga oldi. Bu haqda Al Arabiya telekanali xabar berdi.

Unga ko‘ra terrorchilar rahnamosi Derna shahrida jangarilarga qarshi o‘tkazilgan harbiy operatsiya chog‘ida qo‘lga olingan.

Ma’lumot uchun, 59 yoshli Bin Kamu 1980-yillar o‘rtalarida Liviyani tark etib, Sudan orqali Afg‘onistonga kelgan va “Al-Qoida” jangarilari lagerida tayyorgarlikdan o‘tgan. Usama bin Laden Sudanga kelgan paytda uning shaxsiy haydovchisi va tansoqchisi bo‘lgan. AQSH maxsus kuchlari tomonidan ushlanib, Guantanamo qamoqxonasiga tashlangan. 2007 yilda Liviyaga qamoq jazosini davom ettirishi uchun surgun qilingan. Biroq 2011 yilda Tripolidagi qo‘zg‘olonchilarning namoyishi paytida panjara ortida qochishga muvaffaq bo‘lgan.

TASSning ma’lum qilishicha, Bin Kamu rahbarligida ko‘plab terrorchilik harakatlari amalga oshirilgan. Jumladan, 2012 yilda Bengazidagi AQSH diplomatik vakolatxonasiga uyushtirilgan hujumga ham u boshchilik qilgani aytiladi. O‘shanda to‘rt nafar amerikalik diplomat, jumladan, AQSH elchisi ham o‘ldirilgan edi.