Эъзоз ва эҳтиром ифодаси
  • 19 Апрель 2017

Эъзоз ва эҳтиром ифодаси

9 май — Хотира ва Қадрлаш куни муносабати билан жойларда Иккинчи жаҳон уруши қатнашчилари ва фронт орти меҳнат фахрийлари билан учрашувлар, мулоқотлар ўтказилмоқда. Хонадонларига ташриф буюрилиб, улар ҳолидан хабар олинаяпти.

Андижон вилоятида ҳам бундай тадбирлар юксак савияда ташкил этилмоқда. “Қаҳрамонлик, бурч ва фидойилик”, “Аждодларни хотирлаш — муқаддас қадрият” шиорлари остида ўтказилаётган давра суҳбатларида нуроний отахонлар ёшларга бугунги дориламон кунларнинг қадрига етиш, тинчлик-тотувликни кўз қорачиғидек асраш лозимлигини уқтирмоқдалар.
Шунингдек, Президентимизнинг шу йил 4 апрелдаги “Иккинчи жаҳон уруши қатнашчиларини рағбатлантириш тўғрисида”ги Фармони ҳамда “Хотира ва Қадрлаш кунига тайёргарлик кўриш ва уни ўтказиш чора-тадбирлари тўғрисида”ги қарорига мувофиқ, пул мукофотлари ҳамда эсдалик совғаларини тантанали тарзда топшириш маросимлари бўлиб ўтмоқда.
Ана шундай тадбирлардан бири Андижон шаҳрида истиқомат қилаётган Абдумуталиб ота Тожибоев хонадонида бўлди. Меҳнат фахрийсини қутлаб вилоят ва туман ҳокимияти, кенг жамоатчилик вакиллари ташриф буюрдилар. Шундай шукуҳли кунларда отахон “GM Uzbekistan” қўшма корхонасида ишлаб чиқарилган замонавий автомобилларни бир марталик навбатсиз сотиб олиш ҳамда уларга бепул техник хизмат кўрсатиш имтиёзидан фойдаланган ҳолда, “Дамас” автомашинасини харид қилди.
— Бизга кўрсатилаётган эътибор ва ғамхўрликдан ниҳоятда мамнунмиз, — дейди Абдумуталиб ота. — Президентимизга минг раҳмат! Инсон қадри улуғланган мана шундай юртда яшаётганимиздан бахтиёрмиз.
Бу каби тадбирлар вилоятнинг барча шаҳар ва туманида байрамона руҳда ўтмоқда. Уларда вилоятда истиқомат қилаётган 86 нафар Иккинчи жаҳон уруши қатнашчиси пул мукофотлари ҳамда қимматбаҳо эсдалик совғалари билан тақдирланаяпти.

Саминжон ҲУСАНОВ,
«Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn