Нуронийларга байрам туҳфаси
  • 23 Август 2016

Нуронийларга байрам туҳфаси

Косонсой туманида Ўзбекистон фахрийларини ижтимоий қўллаб-қувватлаш “Нуроний” жамғармаси Марказий Кенгаши қошидаги “Қадрлаш” дам олиш маскани фойдаланишга топширилди.

Косонсой сойи соҳилида жойлашган ушбу муассасанинг сўлим табиати кишига ҳузур бағишлайди. Замонавий дизайн асосида қурилган масканда бир йўла 30 киши, ёзги дам олиш мавсумида 500 нафардан зиёд фахрийлар ҳордиқ чиқариши мумкин. Эътиборлиси, бир ва икки кишига мўлжалланган хоналарда барча шарт-шароит яратилган.
— Мазкур янги дам олиш маскани энг улуғ, энг азиз байрамга ўзига хос туҳфа бўлиб, мамлакатимизда кекса авлодга кўрсатилаётган эътибор, уларнинг соғлиғини тиклаш йўлидаги ғамхўрликнинг яна бир ифодасидир, — дейди меҳнат фахрийси Муфат ота Маматов. — Бу ерга юртимизнинг барча ҳудудидан ташриф буюрадиган нуронийларга Косонсойнинг тоза ҳавоси ҳамда шифобахш суви янада тетиклик бағишлайди, албатта.
Муассасанинг очилиш маросимида иштирок этган “Нуроний” жамғармаси Марказий Кенгаши раиси Ш. Усмонов ва бошқалар юртимизда кексаларни эъзозлаш, уларнинг ижтимоий муҳофазасини кучайтириш борасидаги изчил саъй-ҳаракатлар ҳақида атрофлича тўхталдилар.
Санъаткорлар томонидан намойиш этилган концерт дастури тадбирга янада файз киритди.
Маросимда Наманган вилояти ҳокими Х. Бозоров сўзга чиқди.

 

Қудратилла НАЖМИДДИНОВ,

«Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn