Соғлом турмуш тарғиботи
  • 01 Июнь 2016

Соғлом турмуш тарғиботи

Республика эстрада-цирк коллежида Халқаро кашандаликка қарши кураш кунига бағишлаб “Ёшлар — соғлом турмуш тарзи тарафдори” мавзуида маънавий-маърифий тадбир ўтказилди.

У Тошкент шаҳар Саломатлик ва тиббий статистика институти ҳамда ўрта махсус, касб-ҳунар таълими бошқармаси ҳамкорлигида ташкил этилди.

Таъкидланганидек, мамлакатимизда аҳоли ўртасида соғлом турмуш тарзини шакллантириш, навқирон авлодни ҳар -томонлама соғлом вояга етказиш давлатимиз сиёсатининг устувор масалаларидан бири саналади. Айниқса, жорий йил юртимизда “Соғлом она ва бола йили” деб номланиб, шу асосда Давлат дастурининг қабул қилиниши натижасида мазкур йўналишдаги ишлар қамрови янада кенгайди.

Республикамизда чекишга қарши самарали тизим яратилган. Хусусан, 2011 йил 7 октябрда Ўзбекистон Республикасининг “Алкоголь ва тамаки маҳсулотларининг тарқатилиши ҳамда истеъмол қилинишини чеклаш тўғрисида”ги Қонуни эълон қилинди. Бундан ташқари, қатор давлат ҳамда жамоат ташкилотлари, таълим муассасалари томонидан чекишнинг салбий оқибатлари ҳақида турли акциялар, викториналар, тадбирлар ўтказиб келинаяпти. Бу каби саъй-ҳаракатлар эса ёшларимизни зарарли иллатлар таъсиридан асраш, уларнинг саломатлигини муҳофазалашда муҳим аҳамият касб этмоқда.

— Бугунги учрашувда чекишнинг мудҳиш оқибатлари ҳақида чуқур тушунчаларга эга бўлдик, — дейди мазкур коллеж ўқувчиси Аълохон Содиқова. — Биз ҳеч қачон бундай йўлни танламаймиз. Бизнинг мақсадимиз ўқиш, изланиш ва юксак марраларни қўлга киритишдир.

Дилмурод СОДИҚОВ.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn