Байрам оқшоми ва ҳаво ҳарорати
  • 30 Декабрь 2014

Байрам оқшоми ва ҳаво ҳарорати

Халқимиз Янги йилни паға-паға ёғаётган қор оғушида қарши олишни хуш кўради. Негаки, юртдошларимизнинг пок ниятларидек оппоқ қор ушбу байрамга ўзгача шукуҳ бахш этиб, барчага янада кўтаринки кайфият улашади.

Айниқса, у болажонлар қалбида олам-олам завқ-шавқ уйғотади. Мамлакатимизда 2015 йил остонасида нисбатан илиқ ҳарорат сақланиб тургани туфайли бугун кўпчиликни бир савол жавоби қизиқтирмоқда: хўш, байрам оқшомида қор ёғадими?
Биз бунга ойдинлик киритиш мақсадида Ўзбекистон Республикаси Вазирлар Маҳкамаси ҳузуридаги Гидрометеорология хизмати маркази мутахассисларига мурожаат этдик.
— Кўпинча Ўзбекистон аҳолиси Янги йилни қорсиз қарши олади, — дейди мазкур марказнинг Об-ҳаво прогнозлари бўлими етакчи муҳандиси Равшан Амирқулов. — Фақат айрим йиллардагина табиат кутилган об-ҳавони совға қилган. Бундай ҳолат, масалан, охирги маротаба 2014 йилга ўтар чоғи кузатилган эди. Яъни ўша йилнинг сўнгги ҳафтасида бир неча марта ёғингарчилик бўлиб, хусусан, 27 декабрь куни ёққан қор теварак-атрофни оппоқ кўрпага буркаган.
Янги йил оқшоми об-ҳавоси ҳақида гап кетганда, энг илиқ ҳарорат  2009 йилдан 2010 йилга ўтадиган кечага тўғри келганини айтиш жоиз. Ўшанда 31 декабрь ва 1 январь кунлари ҳарорат 18-19 даража илиқ бўлган.
Буни қарангки, бу гал ҳам республикамизда 31 декабрь — 1 январь кунлари ҳаво очиқ бўлиб, ёғингарчилик кузатилмайди. Ҳарорат кечаси 1-6 даража илиқ, айрим жойларда 0-2 даража совуқ, кундузи 9-14 даражагача илиқ бўлади.
Тошкент шаҳрида ҳам шу куни ёғингарчилик бўлмайди, ҳарорат кечаси 2-4 даража, кундузи 12-14 даража илиқ бўлиши кутилмоқда.

С. РАҲМОНОВ
тайёрлади.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn