Коллеж ўқувчиси онаси ва ўгай укасининг қотилига айланди
  • 06 Февраль 2018

Коллеж ўқувчиси онаси ва ўгай укасининг қотилига айланди

Урганч қурилиш касб-ҳунар коллежининг биринчи босқич ўқувчиси Оғабек Абдуллаев 2018 йилнинг 31 январь куни онаси Гулнора Тўраева билан жанжаллашиб, ғишт бўлаги билан унинг бош қисмига бир неча маротаба уриб, тан жароҳати етказади ва аёллар рўмоли билан бўғиб ўлдиради. 

Машъум воқеа содир бўлган пайтда Оғабекнинг шу уйда яшовчи ўгай укаси Азизбек Машарипов онасига тегмасликни сўраб ялиниб-ёлворади. Аммо кўзлари қонга тўлган қотил ўзи билан бир қориндан талашиб тушган укасини ҳам аямайди. Беш яшар Азизбекни ҳам аёллар рўмоли билан бўғиб ўлдириб, жиноят изини яшириш мақсадида жасадни жомадонга жойлаб тунда уй ертўласига тушириб қўяди. Қўшниларнинг ҳушёрлиги ва огоҳлиги натижасида ушбу жиноят ҳақида ҳуқуқни муҳофаза қилиш органларига хабар қилинади.

Дастлабки суриштирув натижаларига кўра жиноятга алоқадор томонларнинг шахсига оид маълумотлар аниқланди. Маълум бўлишича, Гулнора Тўраева икки марта никоҳсиз тушмуш қуриб, ҳар турмушидан бир нафардан фарзандли бўлган. Илгари судланган. Тайинли бир иш билан шуғулланмай, енгил-елпи ҳаёт кечиришга одатланган. Носоғлом муҳит шаклланган оилада тарбияланган Оғабек ҳам 2017 йилнинг март ойида ўғирлик жинояти содир этиб судланган. Ички ишлар органларида профилактик ҳисобда турган. Мазкур ҳолат бўйича Ўзбекистон Республикаси Жиноят Кодексининг тегишли моддаси билан жиноят иши қўзғатилди.

Одилбек ОДАМБОЕВ, 

“Халқ сўзи” мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn