Сиёсий модернизация жараёнлари ва ОАВ
  • 30 Май 2014

Сиёсий модернизация жараёнлари ва ОАВ

Миллий матбуот марказида сиёсий модернизация жараёнларида ОАВ олдида турган муҳим вазифаларга бағишланган давра суҳбати ўтказилди.

 

 

 

 

Бир қатор манфаатдор ташкилотлар томонидан уюштирилган мазкур тадбирда мамлакатимизда рўёбга чиқарилаётган сиёсий модернизация жараёнларида ОАВнинг масъулиятини ошириш, уларнинг давлат ҳокимияти ва бошқаруви органлари фаолияти устидан жамоатчилик назоратини таъминлаш, ҳокимият ҳамда жамоатчилик ўртасида мустаҳкам алоқа ўрнатиш борасидаги ролини кучайтириш, замонавий ахборот-коммуникация технологияларидан давлат ва жамият қурилиши тизимида кенг фойдаланиш масалалари батафсил муҳокама қилинди.

Эътироф этилганидек, юртимизда жамият ҳаётини демократлаштириш ва модернизациялаш борасида кенг қамровли ишлар олиб борилмоқда. Бунда, шубҳасиз, қонунчилик замон талаблари асосида тобора такомиллаштириб борилаётгани ҳал қилувчи аҳамият касб этмоқда. Хусусан, жорий йилда “Ўзбекистон Республикаси Конституциясининг айрим моддаларига ўзгартиш ва қўшимчалар киритиш тўғрисида (32, 78, 93, 98, 103 ва 117-моддаларига)”ги Қонун қабул қилингани давлат ҳокимияти ва бошқаруви тизимини янада демократлаштириш, “Кучли давлатдан — кучли фуқаролик жамияти сари” тамойилидан кўзланган мақсадларни изчиллик билан рўёбга чиқаришда дастуриламал бўлиб хизмат қилмоқда.

Шунингдек, шу йилнинг 6 майида эълон қилинган “Давлат ҳокимияти ва бошқаруви органлари фаолиятининг очиқлиги тўғрисида”ги Ўзбекистон Республикаси Қонуни ҳам, мазмун-моҳиятига кўра, ушбу мақсадларга қаратилган. Мазкур Қонун давлат органлари фаолиятининг очиқлиги ва шаффофлигини таъминлаш, давлат органларининг фаолияти ҳамда мамлакатимизда рўёбга чиқарилаётган ислоҳотлар ҳақида аҳолининг хабардорлиги самарадорлигини янада оширишга хизмат қилади. Бу эса олиб борилаётган ислоҳотлардан кўзланган асосий мақсад — эркин фуқаролик жамиятини барпо этиш йўлида яна бир тарихий қадам ташланганлигидан далолатдир.

Давра суҳбатида сиёсий модернизация жараёнларининг ҳуқуқий асоси, ушбу жараёнларда ОАВ олдида турган долзарб вазифалар ҳамда уларнинг бу борадаги ўрни ва аҳамияти хусусида ҳам атрофлича сўз юритилди. Айни чоғда сиёсий модернизация жараёнларида журналистларнинг масъулиятини янада ошириш зарурлиги таъкидланди.

Зокир ХУДОЙШУКУРОВ,

«Халқ сўзи» мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn