Самарқанд — Истанбул: илк парвоз амалга оширилди
  • 31 Октябрь 2017

Самарқанд — Истанбул: илк парвоз амалга оширилди

 

“Ўзбекистон ҳаво йўллари” Миллий авиакомпаниясига қарашли самолёт кеча Самарқанд халқаро аэропортидан Самарқанд — Истанбул — Самарқанд йўналиши бўйича илк парвозни амалга оширди.

Шу муносабат билан тантанали тадбир ўтказилди. Кенг жамоатчилик вакиллари қатнашган маросимда сўзга чиққанлар Президентимиз Шавкат Мирзиёевнинг яқинда Туркияга амалга оширган давлат ташрифи давомида мамлакатларимиз ўртасида турли соҳаларда, жумладан, фуқаро авиацияси бўйича ҳамкорлик алоқаларини изчил ривожлантиришга келишилганлигини алоҳида таъкидлашди. Самарқанддан Истанбулга тўғридан-тўғри ҳаво қатновининг йўлга қўйилгани бунинг амалий натижаси эканлиги эътироф этилди.

Мазкур йўналиш давлатларимиз ўртасидаги савдо-иқтисодий алоқаларни янада кенгайтиришда икки мамлакат ишбилармонларига кенг имкониятлар яратиши баробарида, юртимиз сайёҳлик салоҳиятининг юксалишига ҳам хизмат қилади.

— Самарқандлик тадбиркорлар билан ҳамкорликни йўлга қўйганимизга анча бўлган, — дейди туркиялик ишбилармон Меҳмед Оташ Якар. — Шу пайтгача она-юртимга “Тошкент” халқаро аэропорти орқали бориб келардим. Эндиликда Самарқанддан Истанбулга тўғридан-тўғри авиақатнов очилгани мен каби кўплаб ишбилармонлар учун катта қулайлик яратди. Бунинг учун давлатларимиз раҳбарларидан миннатдормиз.

Ушбу йўналишдаги парвозлар ҳозирча ҳар ҳафтанинг душанба, 16 ноябрдан бошлаб эса пайшанба кунида ҳам амалга оширилади. Яъни қатнов ҳафтада икки мартага етказилади. “Ўзбекистон ҳаво йўллари” Миллий авиакомпанияси янги йўналишда йўловчиларга “Airbus А320” ҳамда “Boeing 757” замонавий самолётлари орқали хизмат кўрсатади.

— Самарқанд — Истанбул — Самарқанд йўналиши бўйича илк рейснинг йўловчиси эканлигимдан хурсандман, — дейди самарқандлик Наргиза Қурбонова. — Айниқса, бугунги тантанали маросим том маънода тарихий кун сифатида хотирамизда сақланиб қолади. Икки халқ ўртасидаги дўстона алоқалар бундан кейин яна ҳам ривожланиши ва мустаҳкамланиши тарафдоримиз.

Бахтиёр МУСТАНОВ.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn