Ҳарбийларимиз “Кембрия патрули” халқаро танловида совриндор бўлди
  • 20 Октябрь 2017

Ҳарбийларимиз “Кембрия патрули” халқаро танловида совриндор бўлди

Жорий йилнинг 10 — 17 октябрь кунлари Буюк Британиянинг Брекон шаҳрида қўшин разведкачилари ўртасида ўтказилган “Кембрия патрули” халқаро танловида Ўзбекистон вакиллари муносиб иштирок этди.

Ўзбекистон Республикаси Мудофаа вазирлиги матбуот хизматидан олинган маълумотга кўра, 29 давлатдан 139 жамоа қатнашган ушбу мусобақада мамлакатимиз ҳарбий хизматчилари билан бирга, Арманистон, Бирлашган Араб Амирликлари, Молдова ва Филиппин қўшин разведкачилари илк бор ўз маҳоратини намойиш қилди.

“Кембрия патрули” ҳарбий йўналишдаги энг мураккаб ва нуфузли халқаро танловлардан бири бўлиб, қарийб 40 йилдан буён уюштириб келинади. Унда ҳарбий хизматчиларнинг жисмоний тайёргарлигига алоҳида эътибор қаратилади ва мутахассислар буни махсус бўлинмаларга қабул қилиш жараёни билан қиёслашади.

Кембрия тоғлари жуда оғир иқлим шароити билан ажралиб туради. Қуёш деярли кўринмайди, ҳар замон ёмғир шиддат билан ёғади, ҳудуди ботқоқлик ва ўрмондан иборат, ўтишга қийинчилик туғдиради. Шу боис мусобақада қатнашаётган кўплаб жамоалар финалга етиб бора олмай, баҳсларни эрта тарк этишади.

Юқорида мазкур танловни мураккаб, дея таърифладик. Хўш, бу нималарда кўринади? Белгиланган шартларга мувофиқ, ҳарбий хизматчилар қурол-аслаҳаларни тақиб, 25 килограмм юк билан навигация воситаларисиз Кембрия тоғлари бўйлаб 65 километр масофага пиёда юришади. 1000 метрдан юқори баландликлар ва 750 метргача бўлган пастликларга рўбарў келишади. Ана шу жараёнларда ҳар бир жамоа тоғли ҳамда сув тўсиқларидан ўтиш, ҳудуд разведкасини олиб бориш, шартли душман жойлашган ҳудудни аниқлаш ҳамда уларни йўқ қилиш бўйича ўқув-жанговар операцияларни, шартли -ярадорларга биринчи тиббий ёрдам кўрсатиш, ноқонуний кучлар томонидан гаровга олинганларни озод этиш, оғир шароитли тоғли ҳудудларда пистирмалар қўйиш каби вазифаларни бажаради. Шу орқали танлов иштирокчиларининг иродаси, руҳий ҳолати, етакчилик, чидамлилик қобилиятлари синовдан ўтказилади. 

Мусобақа якунида Ўзбекистон Республикаси Мудофаа вазирлиги қўшин разведкачиларидан иборат жамоа, гарчи илк бор мазкур танловда қатнашганига қарамай, Италия жамоаси билан бирга фахрли иккинчи ўринни эгаллади (танлов шартига -асосан, ҳар бир совринли ўрин иккита жамоага берилади). 

“Кембрия патрули”нинг ғолиблиги ва учинчи ўрин 111 жамоа билан иштирок этган Буюк Британия ҳарбий хизматчиларига насиб қилди.

Танлов ғолиб ва совриндорлари ташкилотчилар томонидан эсдалик медаллари ҳамда фахрий ёрлиқлар билан тақдирланди.

Айтиш жоизки, бу Ўзбекистон Мудофаа вазирлиги қўшин разведкачиларининг халқаро мусобақалардаги дастлабки муваффақияти эмас. Шу йилнинг 29 июль — 12 август кунлари Новосибирск шаҳрида (Россия) ташкил қилинган III Халқаро армия ўйинлари дастуридаги “Қўшин разведкаси аълочилари” танловида ҳамюртларимиз юксак маҳорат кўрсатиб, учинчи поғонани банд этишган эди.

Шавкат ОРТИҚОВ тайёрлади.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn