Хизмат уйлари ва автомашиналар
  • 13 Октябрь 2017

Хизмат уйлари ва автомашиналар

профилактика инспекторлари фаолиятини кучайтиришда муҳим ўрин тутади

Наманган шаҳридаги “Уч фаввора” хиёбонида вилоят ички ишлар бошқармаси таркибидаги таянч пунктлари профилактика инспекторларининг тантанали қасамёд қабул қилиш маросими бўлиб ўтди.

Тадбирда сўз олганлар Президентимизнинг алоҳида эътибори туфайли профилактика инспекторлари самарали фаолият кўрсатиши учун барча шарт-шароит яратилаётганини таъкидладилар.

Хусусан, уларга ўз хизмат ҳудудида уй-жой қуриб берилаётгани ва имтиёзли асосда автомобиль топширилаётгани ана шу юксак эътиборнинг ёрқин ифодасидир.

Дарҳақиқат, вилоятнинг шаҳар ҳамда қишлоқларида меҳнат қилаётган 496 нафар профилактика инспекторининг ўзига бириктирилган ҳудудда хизмат вазифасини сидқидилдан бажариши учун барча имконият ишга солинмоқда. Давлатимиз раҳбарининг шу йил 20 апрелдаги “Ички ишлар органлари таянч пунктларининг профилактика инспекторларини хизмат уй-жойи билан таъминлашга доир қўшимча чора-тадбирлар тўғрисида”ги қарорига мувофиқ, жойларда 295 та тураржой қуриш, 198 та мавжуд бинони қайта реконструкция қилиш, кўп қаватли уйлардан 3 та хонадон сотиб олиш режаси бўйича иш олиб борилиб, хизмат уйлари бирин-кетин фойдаланишга топширилмоқда. Айни чоғда 487 нафар профилактика инспектори билан имтиёзли кредит асосида “Матиз” автомашинаси сотиб олиш бўйича тузилган шартномалар ҳам босқичма-босқич ижросини топмоқда.

Наманган шаҳрининг 4-кичик даҳасидаги таянч пункти профилактика инспектори, лейтенант Дилмурод Раҳматов ҳам кўплаб ҳамкасблари қатори қасамёд қилгач, хизмат уйи ва енгил автомашина калитини қабул қилиб олди.

— Ҳар куни ишга узоқдан қатнардим, — дейди у. — Хизмат худудидан тураржой берилиши йўлимни яқин қилди. Энди маҳалла аҳли билан янада баҳамжиҳат ишлаш имконияти ошди. Бу, ўз навбатида, профилактика ишлари самарадорлигини -юксалтиришда муҳим омил бўлади, албатта.

Соҳадаги ислоҳотлар туфайли профилактика тадбирлари самарадорлиги ортаётгани, айниқса, эътиборга молик. Жорий йилнинг ўтган 9 ойи давомида вилоят бўйича содир этилган жиноятлар сони ўтган йилнинг шу давридагига нисбатан 451 тага, яъни 12,24 фоиз камайгани бунинг яққол тасдиғидир.

Қудратилла НАЖМИДДИНОВ,

«Халқ сўзи» мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn