Меҳр тафти
  • 13 Октябрь 2017

Меҳр тафти

Она учун фарзандининг бахту иқболини кўришдан ортиқроқ бахт йўқ. Биз, Меҳрибонлик уйи тарбиячилари масканимиздаги ҳар бир ўғил-қизнинг камолга етиб, муваффақиятларга эришаётганидан беҳад қувонамиз. Негаки, улар ҳам ўз фарзандимиз.

Муассасамизда мурғак қалб эгаларининг болалик гаштини суриши, яхши тарбия олиши, ҳар томонлама соғлом вояга етиши учун барча қулайлик яратилган. Замонавий ётоқхона, турли тўгараклар, кутубхона, спорт майдони — улар ихтиёрида. Ҳар бир бола ўз қизиқишидан келиб чиққан ҳолда, санъат, миллий ҳунармандлик, спорт билан шуғулланиш имконига эга. Ёзги таътилни эса мамлакатимизнинг энг сўлим оромгоҳларида ўтказишади.

Меҳрибонлик уйида меҳнат қилаётганимга 13 йилдан ошди. Шу давр мобайнида қанчадан-қанча болажонлар улғайиб, ҳаётда ўз ўринларини топишди. Байрамлар баҳонасида ҳол сўраб келишади, олисда бўлишса, қўнғироқ қилишади. Шундай пайтларда бошимиз осмонга етади. Кучимизга куч қўшилади.

Тажрибамдан келиб чиқиб айтаманки, боланинг бегонаси бўлмайди. Болаларимни шаҳримиздаги 8-умумтаълим мактабига олиб борганимда, синфдошларидан баъзилари югуриб келиб мени маҳкам қучоқлаб олишади. Ана шундай паллаларда уларнинг она меҳрига муҳтожликларини сезаман. Турли важларни рўкач қилиб зурриётини қаровсиз қолдираётган айрим ота-оналар буни англаб етишса, кошки эди...

Бу ҳақда тўхталаётганимнинг боиси бор. Масканимизда айни дамда 88 нафар ўғил-қиз тарбияланаяпти. Уларнинг атиги етти нафари чин етим, холос. Қолганларининг яқинлари турли сабабларга кўра, ота-оналик ҳуқуқидан маҳрум қилинган. Биз шу болажонларга оналик меҳрини бераяпмиз.

Буни қарангки, киши болажон бўлса, ўғил-қизларидан меҳрини дариғ тутмаса, нафақат ўзи меҳнат қилаётган жойда, шу билан бирга, бутун мамлакат миқёсида ҳам -ҳурмат-эътибор топаркан. Бунга ўз ҳаётим мисолида яна бир карра ишонч ҳосил қилдим. Мустақиллигимизнинг 26 йиллик байрами арафасида Президентимиз Фармонига мувофиқ, бир гуруҳ юртдошларимиз қаторида давлат мукофоти билан тақдирландим. Бу эътиборга навқирон авлодни Ватанимизга садоқатли, меҳр-оқибатли қилиб тарбиялаш билан жавоб бераман.

Ойша ҲОШИМОВА,

Бухоро шаҳридаги 

32-Меҳрибонлик уйи тарбиячиси,

«Шуҳрат» медали соҳибаси. 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn