«Ҳаётимдаги энг унутилмас воқеа»
  • 12 Октябрь 2017

«Ҳаётимдаги энг унутилмас воқеа»

Қорақалпоғистон Республикаси Вазирлар Кенгашида Президентимиз Фармони билан Ўзбекистон Республикаси фуқаролигига қабул қилинган бир гуруҳ шахсларга фуқаролик паспортлари тантанали равишда топширилди.

Таъкидланганидек, “Ўзбекистон Республикасининг фуқаролиги тўғрисида”ги Қонун кучга кирган пайтда турли сабаблар билан мамлакат ташқарисида бўлган маҳаллий аҳоли, бошқа давлатда туғилиб ўсиб, юртимизни ўз Ватани сифатида дилдан тан олган, унинг тараққий этиши ва гуллаб-яшнаши учун муносиб ҳисса қўшиб келаётган инсонлар фуқароликка қабул қилинади.

Туркманистон Республикасида туғилган Комилжон Йўлдошев кўп йиллардан буён Нукус шаҳрида яшайди. Қорақалпоқ давлат университетида таълим олди. Савдо соҳасида астойдил меҳнат қилиб, Ватанимиз равнақига муносиб улуш қўшиб келмоқда.

— Йигирма беш йиллик орзуим рўёбга чиқди, — дея хурсандлигини яшира олмайди К. Йўлдошев. — Ўзбекистон Республикаси фуқароси, деган шарафли номга эга бўлдим. Юртбошимиздан чексиз миннатдорман. Бундан кейин ҳам бор билим ва тажрибамни мустақил диёримиз юксалиши йўлида сафарбар этаман.

Тадбирда ўрта махсус, касб-ҳунар таълими муассасалари ҳамда умумтаълим мактабларининг 16 ёшга тўлган ўқувчиларига биометрик паспортлар топширилди.

— Бу ҳаётимдаги энг унутилмас воқеалардан биридир, — дейди Нукуc шаҳридаги 22-умумтаълим мактаби ўқувчиси Дилноза Узоқберганова. — Келгусида республикамиз тараққиётига ҳисса қўшишга астойдил ҳаракат қиламан.

Ҳидоят АҲМЕДОВ, 

«Халқ сўзи» мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn