Илғор тажрибалар оммалаштирилаяпти
  • 22 Сентябрь 2017

Илғор тажрибалар оммалаштирилаяпти

Андижонда Ўзбекистон Республикаси Ўрмон хўжалиги давлат қўмитаси ташаббуси билан ўрмон хўжалигини ривожлантириш, соҳага замонавий технологияларни қўллаш, бўш ерлардан унумли фойдаланиш масалаларига бағишланган илмий-амалий семинар ўтказилди. Унда соҳа мутахассислари, илмий-тадқиқот институтлари олимлари, кенг жамоатчилик вакиллари қатнашди.

Вилоятда ўрмонзорлар майдонини кенгайтириш, шифобахш ўсимлик ҳамда дарахт турларини кўпайтириш юзасидан кенг кўламли ишлар олиб борилаётгани таъкидланди. Жумладан, 1 минг 300 гектар ерда ёнғоқзор ва пистазорлар, сув-ботқоқли ҳудудларда балиқ ҳавзалари ташкил этилаяпти. Фойдаланилмай турган 40 гектар майдонда эса фармацевтика саноати учун қимматбаҳо хом ашё манбаи ҳисобланган заъфарон (шафран) етиштириш йўлга қўйилгани қувонарлидир. 

— Президентимиз вилоятимизга ташрифи чоғида фойдаланилмаётган адирликларни ўрмон хўжаликлари ихтиёрига ўтказиш тўғрисида кўрсатма берганди, — дейди Ўрмон хўжалиги илмий-тадқиқот институтининг Андижон филиали директори Зокиржон Бўстонов. — Шундан келиб чиқиб, ҳозирги кунгача 4 минг 440 гектар майдон хўжалигимиз тасарруфига қўшилди. Бу ерларда ҳам доривор, ҳам даромадли ўсимликларни етиштириш, янги боғлар яратиш кўзда тутилган. 

Тадбир иштирокчилари ўрмон хўжаликларида бўлиб, парваришланаётган ноёб кўчатлар, интенсив агротехнологиялар самараси, илғор иш услублари билан ҳам танишдилар. 

Семинар якунида вилоятда тўпланган бой тажрибани республикамизнинг бошқа ҳудудларига ҳам кенг ёйиш, ўзаро ҳамкорликни мустаҳкамлаш, айрим камчиликларни бартараф этиш борасида фикр-мулоҳазалар билдирилиб, тегишли тавсиялар ишлаб чиқилди. 

Саминжон ҲУСАНОВ,

«Халқ сўзи» мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn