АКТ Саммити, роботлар намойиши ва интерактив лойиҳалар
  • 19 Сентябрь 2017

АКТ Саммити, роботлар намойиши ва интерактив лойиҳалар

Мамлакатимизда бошланган “ICTWEEK Uzbekistan — 2017” ахборот-коммуникация технологиялари ҳафталигининг бу галги дастури кўпчиликда катта қизиқиш уйғотмоқда.

Мазкур тадбир Ахборот технологиялари ва коммуникацияларини ривожлантириш вазирлиги кўмагида “ICTnews conferences” ташкилоти томонидан БМТнинг Тараққиёт дастури, “Электрон ҳукумат” тизимини ривожлантириш маркази, “UZINFOCOM”, Тошкент ахборот технологиялари университети, Тошкент шаҳридаги Инҳа университети билан ҳамкорликда ўтказилмоқда.

Кеча пойтахтимизда уюштирилган матбуот анжуманида ушбу ҳафталикнинг аҳамияти ва унинг доирасида бўладиган тадбирлар хусусида батафсил маълумот берилди.

2004 йилдан буён ташкил этиб келинаётган “ICTWEEK Uzbekistan”га бу гал янгича -шаклда ёндашилди. Масалан, иштирокчи ва ташриф буюрувчиларга янада қулайлик яратиш мақсадида тадбирлар “Ўзэкспомарказ” Миллий кўргазма мажмуаси ҳудудида бўлиб ўтади.

22 сентябргача давом этадиган ҳафталик доирасидан ўн бешга яқин турли анжуманлар ўрин олган. Уларнинг дастлабкиси Ахборот-технологияларига оид Саммит бўлиб, тадбирда давлат органлари, соҳа муассасаларининг масъул раҳбарлари билан бирга, “Microsoft”, “IBM” (АҚШ), “Huawei” (Хитой) каби нуфузли халқаро компаниялар таҳлилчилари чиқиш қилиши кутилмоқда.

Интернет ва технологиялар йўналишида халқаро ҳамда маҳаллий натижалар муҳокамасига бағишлаб 20-21 сентябрь кунлари ўтказиладиган форумда “Ўзбекистонда “электрон ҳукумат” ривожи”, “Молия соҳасида рақамлаштириш”, “Ахборот технологиялари инфратузилмаси” ҳамда “Ахборот хавфсизлиги” мавзуларида фикр-мулоҳазалар юритилади.

“ICTEXPO — 2017” ахборот-коммуникация технологиялари кўргазмаси ҳафталикнинг энг оммабоп тадбирлари сирасига киради. Бугун бошланадиган мазкур тадбирда 70 дан зиёд компаниялар ўз маҳсулотларини намойиш қилади. Ушбу кўргазма ҳам бу гал ноанъанавий тарзда, аниқроғи, инновацион ёндашув асосида кечади. Хусусан, “Cyber Games” компьютер ўйинлари мусобақаси, “Старт-ап” лойиҳалар тақдимотлари, “RoboKidz” — роботлар намойиши, 3D-заллар, интерактив ўйинлар ташриф -буюрувчиларда катта таассурот қолдириши, шубҳасиз.

Омонулла ФАЙЗИЕВ,

«Халқ сўзи» мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn