Эзгулик тарғиботи
  • 14 Сентябрь 2017

Эзгулик тарғиботи

Президентимиз Шавкат Мирзиёевнинг 2017 йил 12 январдаги “Китоб маҳсулотларини чоп этиш ва тарқатиш тизимини ривожлантириш, китоб мутолааси ва китобхонлик маданиятини ошириш ҳамда тарғибот қилиш бўйича комиссия тузиш тўғрисида”ги фармойиши ёшлар маънавиятини юксалтиришга хизмат қилмоқда. Шунга мувофиқ, юртимизнинг ҳар бир ҳудудида “Китоб олами”, “Китоб дунёси” каби мажмуалар фаолияти йўлга қўйилаяпти.

Китоб тарғиботи билан боғлиқ давра суҳбатлари, учрашувлар уюштирилаётир. Шундай тадбирлардан бири яқинда Карманада ўтказилди.

“Адабиётга эътибор — маънавиятга, келажакка эътибор” шиори остидаги анжуман Ўзбекистон ёшлар иттифоқи, Республика Маънавият ва маърифат маркази ҳамда Навоий вилояти ҳокимлиги ташаббуси билан ташкил этилди. Унда шоир-ёзувчилар, китобхонлар, ёшлар қатнашди.

Семинар иштирокчилари дастлаб ҳудуд марказида бунёд этилган “Китоб олами” мажмуасининг очилиш маросими гувоҳига айланишди. Кенг ва шинам савдо залига эга ушбу маскан қисқа фурсатда қад ростлади. Бу ерда китобхонлар учун барча шарт-шароит яратилган бўлиб, унинг фонди 5000 дан зиёд адабиётлардан иборат.

Шундан сўнг анжуман ўз ишини давом эттирди. Мулоқот руҳидаги мазкур тадбирда инсоният тамаддунида китобнинг тутган ўрни, адабиёт ва замон, китобхонлик маданияти хусусида сўз борди. Мамлакатимизда ноширлик фаолияти, мазмунан бой, ғоявий бақувват, бадиий пухта китоблар савдосини олис ҳудудларда ҳам мунтазам ташкил этиш юзасидан таклиф ва мулоҳазалар ўртага ташланди. Шунингдек, китобхон ва муаллиф мулоқотларини мунтазам уюштириш юзасидан фикр-мулоҳазалар билдирилди.

— Бу каби тадбирлар биз, ёшларнинг мутолаа маданиятини оширишга хизмат қилади, — дейди карманалик Бекзод Савуров. — Ўзим кейинги икки йилда 20 дан зиёд бадиий адабиётларни ўқиб чиқдим. Албатта, бундай интилишларимиз билан зукколик, зийраклик каби фазилатларимизни янада камол топтирамиз.

Анжуманда китобхонлик маданиятини юксалтириш, китоб мутолаасини одобнинг ажралмас меъёрларидан бирига айлантириш, ноширлик фаолиятининг долзарб масалалари юзасидан фикр-мулоҳазалар ўртага ташланди. Китоб тарғиботи борасида Маънавият ва маърифат марказининг ҳудудий бўлинмалари олдида турган вазифалар юзасидан тавсиялар берилди.

Темур ЭШБОЕВ,

«Халқ сўзи» мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn