Бунёдкорлик ва эзгу анъаналар ифодаси
  • 22 Август 2017

Бунёдкорлик ва эзгу анъаналар ифодаси

Юртимизда 19-20 август кунлари умумхалқ хайрия ҳашари уюшқоқлик билан ўтказилди. Истиқлолимизнинг 26 йиллик тўйини муносиб нишонлашга тайёргарлик кўриш мақсадида ташкил этилган ҳашарда 18 миллион 675 минг нафардан зиёд аҳоли, жумладан, 12 миллион 424 минг нафардан ортиқ ёшлар иштирок этди.

Уларнинг саъй-ҳаракати билан ҳудудлардаги тураржой мавзелари ва ҳовлилар, гузар ҳамда хиёбонлар, зиёратгоҳ ва қабристонлар, ариқ ва лотоклар, болалар майдончалари, кўчаю йўлаклар тартибга келтирилди. Кексалар ва ногиронлар, ёлғиз қариялар, кам таъминланган оилалар вакилларини моддий ҳамда маънавий қўллаб-қувватлаш юмушлари амалга оширилди.
“Маҳалла” хайрия жамоат фонди республика бошқаруви маълумотига кўра, ҳашар давомида 41 минг гектарга яқин майдон ободонлаштирилди, 27 минг километр узунликдаги ариқ ва лотоклар тозаланди.
Шу билан бирга, 9 мингдан ортиқ қабристон ва 800 га яқин зиёратгоҳлар ободонлаштирилди. Эътиборлиси, икки кун давомида аҳолининг ижтимоий ҳимояга муҳтож қатламига мурувват ёрдамлари кўрсатиш янада кенг қулоч ёзди. Хусусан, 18 мингга яқин кам таъминланган оилаларнинг 615 минг метр квадратдан зиёд уй-жойлари ҳашар йўли билан таъмирлаб берилди. 24 мингга яқин эҳтиёжманд оилаларга моддий ёрдам кўрсатилди.
Халқимизда яна бир гўзал одат бор — ҳашар кунлари катта бунёдкорликларга қўл урилади. Эзгу мақсад йўлида бошланган ишлар якунига етказилиб, шароитлар янада яхшиланади. Буни маҳаллаларда 297 та савдо ва маиший хизмат кўрсатиш объекти ишга туширилганлиги мисолида ҳам кўриш мумкин. Улар орасида гўзаллик салони, сартарошхона, кутубхона, маҳалла гузари, нуронийлар маркази, турли ишлаб чиқариш цехлари, маҳалла фуқаролар йиғини биноси, болалар спорт майдончалари борлиги, айниқса, эътиборга молик.
Қорақалпоғистон Республикасининг Шуманай туманидаги “Маданият” маҳалла фуқаролар йиғинида замонавий “Китоб олами” дўкони қуриб битказилди. Бунга “Маҳалла” хайрия жамоат фонди маблағлари ҳисобидан 500 миллион сўм йўналтирилди.
Ҳашарчилар саъй-ҳаракати билан Кармана туманидаги “Варқ” массивида барпо этилган 340 ўринли умумтаълим мактаби фойдаланишга шай қилиб қўйилди.
— Пастдарғом туманидаги Галатут маҳалласида яшайман, — дейди Санобар Ҳайдарова. — Оилавий шароитимни ҳисобга олиб, уйимнинг кўча тарафини ҳомийлар таъмирлаб беришди. Раҳмат, барака топишсин.
Олот туманидаги “Аккали” маҳалла фуқаролар йиғини раиси Дониёр Ортиқовнинг айтишича, ҳашар кунлари Маърифат кўчасида 192 миллион сўм маблағ эвазига бунёд этилган “Матбуот тарқатувчи” шуъба корхонаси туман филиали биноси ҳамда “Китоб олами” дўкони фойдаланишга топширилди.
— Наманганлик келин ва қизлар қуёшдан эрта уйғонишади, қўни-қўшнилар ҳали кўчага чиқмасидан, ҳовлилар олдини  супуриб, чиннидай тоза қилиб қўяди, — дейди вилоят ҳокимлиги хотин-қизлар масалалари котибияти мудири Умида Мамажонова. — Ҳашар кунлари 1 миллион 61 минг нафар опа-сингилларимиз эрталабдан умумхалқ юмушига отланди. Улар нафақат ўз уйлари, балки маҳалла гузари, ижтимоий муассаса, иш жойларини ҳам янада ораста ҳолатга келтирдилар.
— Умумхалқ ҳашарида ёшлар, жумладан, уюшмаган ёшлар ҳам алоҳида фаоллик кўрсатишди, — дейди Фуқароларнинг ўзини ўзи бошқариш органлари фаолиятини мувофиқлаштириш бўйича Сурхондарё вилояти кенгаши раиси ўринбосари Отабек Бобожонов. — Миллий қадриятларимиздан келиб чиқиб, кексалар, уруш ва меҳнат фахрийлари, ёлғиз қариялар, эҳтиёжманд оилаларга меҳр-мурувват ёрдамлари кўрсатилди.
Умумхалқ хайрия ҳашари мамлакатимизнинг бошқа ҳудудларида ҳам уюшқоқлик билан ўтказилди.

З. ХОЛТЎРАЕВ.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn