Мусиқий таълимда ўзибўларчиликка йўл қўйиб бўлмайди
  • 16 Август 2017

Мусиқий таълимда ўзибўларчиликка йўл қўйиб бўлмайди

Мусиқа инсонни эзгуликка етаклайди, қалбларга хотиржамлик, осойишталик улашади. Унинг таъсирчан кучи одамларга илҳом бағишлайди, ижодий изланишларга кенг йўл очади. Ҳозирги кунда мамлакатимизнинг барча ҳудудида мусиқа ва санъат мактаблари самарали фаолият юритаётгани, миллий мусиқа санъати жаҳон саҳналарида шуҳрату довруқ қозонаётгани бу борадаги саъй-ҳаракатлар самараси, десак асло янглишмаймиз.

Давлатимиз раҳбарининг жорий йил 8 августдаги “Ўзбекистон давлат консерваторияси фаолиятини янада ривожлантириш ва такомиллаштириш чора-тадбирлари тўғрисида”ги қарори изчил ислоҳотларнинг мантиқий давоми сифатида санъат аҳли, мусиқа ихлосмандлари, соҳа мутахассислари томонидан кўтаринки руҳда кутиб олинди. 

Айтиш жоизки, ўтган даврда Тошкент давлат консерваториясига замонавий жиҳозланган янги бино қуриб берилди, унинг нуфузи ва мақомини ошириш мақсадида Ўзбекистон давлат консерваторияси, деган  ном берилди. Унинг қошида иқтидорли ёшлар академик мусиқа лицейи ташкил этилди.

Албатта, ушбу йўналишда эришилган ютуқларда консерваториянинг алоҳида ўрни борлигини эътироф этиш зарур. Мусиқа ва санъат мактаблари, ўрта махсус, касб-ҳунар таълими ва олий таълим йўналишлари учун кадрлар етказиб бериш, ўқув-услубий мажмуалар тайёрлаш, ўқув адабиётлари яратиш бўйича муайян ишлар амалга оширилди. Бироқ бугунги кунга келиб соҳа фаолияти замон талабларига мос эмаслигини кўрсатмоқда. Хусусан, таълим-тарбия жараёни тизимли равишда олиб борилмаяпти. Ўқув дастурлари тайёрлаш ва ўқитиш методикасида ўтган аср руҳи сезилиб туради. Бунда Маданият, Олий ва ўрта махсус таълим вазирликларининг ушбу масалага эътибори етарли даражада бўлмагани, амалий кўмак кўрсатилмагани, ўзибўларчиликка ташлаб қўйилгани сабаб бўлганини кўплаб мисоллар орқали кўриш мумкин. 

Президентимиз қарори билан Ўзбекистон давлат консерваторияси фаолиятини янада ривожлантириш ва такомиллаштиришга доир чора-тадбирлар дастури тасдиқлангани соҳадаги фаолиятни янги босқичга кўтаришда, бу борадаги ислоҳотларни замонавий талаблар асосида ташкил этишда муҳим роль ўйнайди.

Бинобарин, Дастурда ёшларимизни мусиқа санъатига ошно қилиш, миллий ва умумбашарий қадриятларнинг энг яхши намуналаридан баҳраманд этиш, уларнинг маданий савиясини юксалтиришга оид  вазифалар белгилангани аҳамиятлидир. Албатта, бу ёш авлодни маънан етук қилиб вояга етишларини кафолатлашга, миллий ғоя ва мафкурамиз руҳида тарбиялашга зарур шарт-шароит яратади.

Миллий мусиқа санъатимизни ривожлантириш тенденциялари, мусиқий таълим сифатини янги босқичга олиб чиқиш бўйича аниқ вазифалар Дастурда акс этгани эътиборга молик. Белгиланган чора-тадбирларни амалга ошириш кадрлар салоҳиятига бевосита боғлиқлиги назарда тутилган ҳолда, ушбу масалага алоҳида урғу берилган. Бу мусиқа ва санъат мактабларида замонавий талабларга жавоб берадиган қўлланмалар яратилишида муҳим ўрин тутади. 

Умуман айтганда, қарорда консерватория фаолиятини тубдан такомиллаштириш, айниқса, унинг моддий-техника базасини мустаҳкамлаш, профессор-ўқитувчиларни қўллаб-қувватлаш борасида  кўзда тутилган саъй-ҳаракатлар ушбу соҳани янги босқичга кўтариш баробарида, миллий мусиқа санъатимиз довруғини жаҳонга кенг ёйишга хизмат қилади.

Ўрол ҲАЙИТОВ,

Ўзбекистон Республикаси Олий Мажлиси 

Қонунчилик палатаси депутати, 

«Миллий тикланиш» демократик

партияси фракцияси аъзоси.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn
Мазкур рукндаги бошқа мақолалар: « Болалик олами Ижод аҳлига юксак эътибор »