Ўзбекистон ёшлар иттифоқи: Юксак ишонч масъулияти
  • 18 Июль 2017

Ўзбекистон ёшлар иттифоқи: Юксак ишонч масъулияти

Гулистон шаҳрида Ўзбекистон ёшлар иттифоқи Сирдарё вилояти кенгашининг кенгайтирилган -йиғилиши бўлиб ўтди.

Унда  Ўзбекистон Республикаси Президенти Шавкат Мирзиёев томонидан шу йил 30 июнда Тошкент шаҳрида бўлиб ўтган ёшлар билан учрашувда белгилаб берилган вазифалар ижроси юзасидан иттифоқнинг вилоят кенгаши ва ёшлар масалалари бўйича идоралараро ҳудудий кенгаши олдида турган вазифалар атрофлича муҳокама қилинди.

Таъкидландики, юртимизда замон талабларига мос равишда фаолият юритадиган Ўзбекистон ёшлар иттифоқининг ташкил этилиши ва келажагимиз эгаларига юксак ишонч билдирилгани сирдарёлик йигит-қизларнинг ҳам иштиёқини, ғайрат-шижоатини янада ошириб юборди. Шу билан бирга, улардаги Ватанга дахлдорлик  масъулиятини янада мустаҳкамлади. Бинобарин, бугун воҳада минг-минглаб навқирон авлод вакиллари ижтимоий-иқтисодий ҳаётнинг турли йўналишларида фаол иштирок этмоқда, замонавий таълим муассасаларида қунт билан ўқиб-ўрганаяпти.

— Бугун биз, йигит-қизларнинг ҳар жиҳатдан етук инсонлар бўлиб камолга етиши учун барча шароит яратилган, — дейди Ўзбекистон ёшлар иттифоқининг Гулистон давлат университетидаги бошланғич ташкилоти етакчиси Зокир Зикряев. — Президентимиз томонидан кўрсатилган юксак эътибор эса бу борадаги имкониятларимизни янада кенгайтирди. Айни чоғда, энг муҳим вазифа — эртамиз давомчиларининг жамият ҳаётидаги фаоллигини ошириш юзасидан аниқ чора-тадбирлар белгилаб берилди. Зеро, давлатимиз раҳбарининг жорий йил 5 июлда қабул қилинган “Ёшларга оид давлат сиёсати самарадорлигини ошириш ва Ўзбекистон ёшлар иттифоқи фаолиятини қўллаб-қувватлаш тўғрисида”ги Фармонида  кўрсатилганидек, эндиликда мазкур тузилма республикада ёшларга оид давлат сиёсатининг амалга оширилишида давлат органлари, ННТ ва фуқаролик жамиятининг бошқа институтлари билан самарали ҳамкорликни таъминловчи, “Ёшлар — келажак бунёдкори” шиори остида профессионал фаолиятни амалга оширувчи ташкилотга айланади.

Тадбирда ташкилий масалалар кўриб чиқилди. Ўзбекистон ёшлар иттифоқи Сирдарё вилояти кенгашига Шавкат Зайниддинов раис этиб сайланди.

Йиғилишда Ўзбекистон Республикаси Президентининг Давлат маслаҳатчиси — Ўзбекистон ёшлар иттифоқи Марказий Кенгаши раиси Қ. Қуронбоев, Сирдарё вилояти ҳокими ў. Мирзаев сўзга чиқди.

Аҳмадали ШЕРНАЗАРОВ,

«Халқ сўзи» мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn