Ёшларни бирлаштирган акция
  • 03 Май 2017

Ёшларни бирлаштирган акция

Тошкент вилоятида “Буюк келажагимизни мард ва олижаноб халқимиз билан бирга қурамиз” шиори остида маънавий-маърифий тадбирлар ташкил этилди.

Халқ билан мулоқот ва инсон манфаатлари йили муносабати билан вилоят ҳокимияти, Ўзбекистон Республикаси Маданият, Мудофаа, Олий ва ўрта махсус, Халқ таълими вазирликлари, Ёзувчилар уюшмаси, Маънавият тарғибот маркази, “Ўзбеккино” Миллий агентлиги, “Камолот” ёшлар ижтимоий ҳаракати, “Ўзбекконцерт” давлат муассасаси ҳамкорлигида ўтказилган мазкур акция аҳоли, айниқса, ёш авлодга Президентимиз раҳнамолигида мамлакатимизда олиб борилаётган улкан ислоҳотлар моҳиятини кенг тушунтириш, уларни рўй бераётган улуғвор ўзгаришлар, бунёдкорлик жараёнлари билан яқиндан таништиришга қаратилди.

Таълим муассасалари, ташкилот ҳамда маҳаллаларда бўлиб ўтган самимий мулоқотлар, адабий кечалар ва гала-концертларда элимиз ардоғидаги шоир ҳамда ёзувчилар, олим ва санъаткорлар, таниқли спортчилар қатнашди.

— Бу галги тадбирларда нафақат иқтидорли ҳамда ташаббускор навқирон авлод вакиллари, балки маҳаллалардаги уюшмаган ёшлар ҳам кенг жалб қилинди, — дейди вилоят маданият бошқармаси бошлиғи Хуршид Тошпўлатов. — Эътиборлиси, бундай кўламли тарғибот акцияси эртамиз эгаларида ватанпарварлик ва юртимизда кечаётган беқиёс ўзгаришу янгиланишларга дахлдорлик ҳиссини мустаҳкамлашга хизмат қилади.

Ангрен шаҳридаги учрашув ҳамда мулоқотлар ҳам, кутилганидек, кўтаринки руҳда ўтди. Унда сўзга чиққанлар барчамизнинг кўз ўнгимизда юз бераётган янгиланишлар, қабул қилинаётган Фармон ва қарорлар мазмун-моҳияти ҳақида сўз юритдилар.

Кончилар шаҳрида “Биз — буюк юрт фарзандларимиз!” номли танловнинг ҳудудий босқичи ғолибларини тақдирлаш маросими ҳам ташкил этилди. ўолиб ҳамда совриндорлар фахрий ёрлиқ ва эсдалик совғаларни элимиз ардоғидаги шоиру санъаткорлардан қабул қилиб олишди.

— Бугун мен учун эсда қоларли кун бўлди, — дейди танлов ғолиби, Ангрен тиббиёт коллежи ўқувчиси Дилшода Абдумаликова. — Коллежимизга севимли шоир, ёзувчи ҳамда санъаткорларимиз келишди. Биз билан дилдан суҳбатлашишди. Ўз ижодларидан баҳраманд этишди. Уларнинг самимий гапларига, ўгиту маслаҳатларига қулоқ тутиб, келажакда устозларимиз, ота-оналаримиз юзини ёруғ қилиш, она-Ватанимизга муносиб фарзанд бўлиш учун янада яхшироқ ўқиб, изланишни кўнглимизга маҳкам тугдик.

Раҳматилла ШЕРАЛИЕВ,

«Халқ сўзи» мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn