Изчил ҳамкорлик самараси
  • 21 Октябрь 2016

Изчил ҳамкорлик самараси

Андижон давлат тиббиёт институти клиникасида замонавий лапораскопия ўқув маркази фойдаланишга топширилди.

Германия халқаро ҳамкорлик ташкилотининг “Юқори технологик тиббий асбоб-ускуналардан фойдаланиш бўйича тиббий ва техник мутахассисларнинг малакасини ошириш” лойиҳаси доирасида ташкил этилган ушбу марказнинг очилиш маросимида кенг жамоатчилик вакиллари, етакчи олимлар, шифокорлар ҳамда талаба-ёшлар қатнашди.

— Ўзбекистонда тиббиёт соҳаси жадал ривожланиб бормоқда, — дейди Германия халқаро ҳамкорлик жамияти (GIZ)нинг лойиҳа раҳбари Гунар Штротте. — Аҳоли саломатлиги муҳофазаси давлат сиёсати даражасига кўтарилгани эътирофга лойиқ. Ушбу эзгу мақсад йўлида мамлакатингиз билан ҳамкорлик қилаётганимиздан мамнунмиз.

Ўқув марказини илғор ахборот ва тиббиёт технологиялари билан жиҳозлаш ишларига 355 мил-лион сўм йўналтирилди. Натижада бу ерда беморларга аниқ ҳамда тезкор ташхис қўйиш, даволаш имконияти юзага келди. Шунингдек, марказда шифокорларнинг малакасини оширишга ҳам қулай шароит яратилди.

Яна бир эътиборли жиҳати, энг сўнгги русумдаги тиббиёт дастгоҳлари ёрдамида барча турдаги жарроҳлик амалиётлари тиғсиз бажарилади.

Марказнинг очилиш маросимидан сўнг хорижлик олимлар ҳамда Республика шошилинч тиббий ёрдам илмий маркази мутахассислари томонидан Андижон, Фарғона ва Наманган вилоятларида фаолият кўрсатаётган жарроҳлар учун маҳорат дарслари ташкил этилди.

 

Саминжон ҲУСАНОВ, 

«Халқ сўзи» мухбири. 

Хурсандбек АРАББОЕВ

олган сурат.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn