Тиббиёт тараққиётидаги бош мезон
  • 29 Сентябрь 2017

Тиббиёт тараққиётидаги бош мезон

Пойтахтимиздаги Миллий матбуот марказида “Тиббий таълимдаги ислоҳотлар — мамлакатимиз тиббиёт соҳасининг тараққиёт мезонларидан бири” мавзуида матбуот анжумани ўтказилди.

Унда Ўзбекистон Республикаси Соғлиқни сақлаш вазирлигининг масъул ходимлари, ихтисослаштирилган ва илмий-амалий тиббиёт марказлари, республика даражасидаги даволаш-профилактика муассасалари раҳбарлари ҳамда журналистлар қатнашди.

Тадбир Президентимиз Шавкат Мирзиёевнинг тиббий таълимни ислоҳ қилиш ва уни дунё стандартлари даражасига етказиш бўйича берган топшириғи юзасидан олиб борилаётган ишлар, тизимда кутилаётган ўзгаришлар натижаларига бағишланди.

Таъкидланганидек, ҳар қандай соҳа истиқболи, хусусан, тиббиёт ривожи ҳам мазкур йўналишда тайёрланаётган кадрлар салоҳиятига боғлиқ. Гарчи, энг замонавий техникалар, сўнгги технологиялар тармоққа киритилса-да, бинолар реконструкциялаштирилиб, мукаммал бошқарув тизими шакллантирилса-да, кадрлар масаласида оқсаш бўлса, муваффақиятга эришилмайди. Давлатимиз раҳбари соғлиқни сақлаш соҳаси вакиллари билан ўтказган тўртта учрашувда ҳам тиббиёт ходимларини тайёрлаш масаласига алоҳида тўхталгани бежиз эмас.

Президентимизнинг шу йил 5 майдаги “Ўзбекистон Республикасида тиббий таълим тизимини янада ислоҳ қилиш чора-тадбирлари тўғрисида”ги қарори ушбу йўналишда муҳим бурилиш ясаб берди.

Айтиш керакки, олий тиббий таълим муассасаларида бакалавриат босқичининг (даволаш иши) 7 йил давом этиши замон талабларига жавоб бермаслиги билан бирга, ушбу таълим учун асосланмаган ортиқча молиявий маблағларни ҳам талаб қилаётганди.

Давлатимиз раҳбарининг мазкур қарорида тиббий кадрлар етишмовчилигини бартараф этиш масаласининг ечими сифатида тиббий таълим йўналишларидаги бакалавриат тизимида ўқиш муддатлари белгилаб берилди. Унга кўра, 2017/2018 ўқув йилидан бошлаб, муайян таълим давомийлиги даволаш иши, касбий таълим (даволаш иши), ҳарбий-тиббиёт иши (даволаш иши), педиатрия ишида 6 йил, тиббий-биологик ишда 4 йил, тиббий профилактика ишида 5 йилга туширилди. Эътиборли томони, ҳозирги вақтда “даволаш иши”, “касбий таълим” (даволаш иши), “ҳарбий-тиббиёт иши” (даволаш иши), “педиатрия иши” бакалавриат йўналишлари бўйича таълим олаётган 2 — 5-босқич талабалари ҳам таълимни 6 йиллик ўқув дастури асосида давом эттириши кўзда тутилган.

Қолаверса, эндиликда тиббиёт олий таълим муассасалари битирувчиларининг дипломига ихтисослик қайд этилиши белгилаб қўйилди.

Анжуманда оммавий ахборот воситалари ходимлари соҳага оид яна кўплаб янгиликлардан хабардор бўлишди.

Мавжуда ХОЛМАТОВА.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn