Одамлар тиббий хизматдан мамнун бўлсин
  • 19 Август 2017

Одамлар тиббий хизматдан мамнун бўлсин

Халқимизни рози қилиш учун, энг аввало, унинг сифатли тиббий хизматга бўлган -талабини қондириш бугунги кунда устувор вазифалардан ҳисобланади. Ўтган даврда давлатимиз раҳбари томонидан айнан ушбу соҳадаги мавжуд ҳолат чуқур танқидий -таҳлил қилиниб, бу борада аниқ чора-тадбирлар белгилаб берилгани ҳамда уларнинг ижроси изчил таъминланаётгани йиғилиб қолган масалаларни самарали ҳал этишда муҳим аҳамиятга эга бўлмоқда.

Олий Мажлис Қонунчилик палатасида Аҳолига тиббий хизмат кўрсатишни ва дори воситалари таъминотини янада яхшилаш, ушбу соҳадаги қонунчиликни амалиётга самарали татбиқ қилиш борасидаги ишларни мувофиқлаштириш бўйича комиссия томонидан ўтказилган матбуот анжуманида мазкур йўналишда олиб борилган ишлар, келгусидаги режалар хусусида фикр алмашилди.    

Яқинда Президентимиз Шавкат Мирзиёев парламент палаталари ҳамда сиёсий партиялар вакиллари билан бўлиб ўтган учрашувда тиббиёт соҳаси мутасаддилари ахбороти кўпроқ Қонунчилик палатасида эшитилаётганига эътибор қаратиб, бундай иш услубини жойларга чиқиб, турли мутахассислар билан бирга юриб, қишлоқ врачлик пунктлари бўладими, болалар ёки аёллар шифохоналари бўладими, энг камида ўн кун юриб, улардаги ҳақиқий аҳволни аниқлаб, муаммоларни ҳам қонуний, ҳам амалий нуқтаи назардан ҳал қилиш юзасидан таклифлар билдириш билан алмаштириш, қисқача айтганда, парламент назорати бўйича таъсирчан ва самарали тизим яратиш ҳар томонлама мақсадга мувофиқ эканлигини таъкидлади. 

Анжуманда маълумот берилганидек, ушбу вазифаларни ҳисобга олган ҳолда, Комиссия фаолияти тубдан қайта кўриб чиқилди. Комиссия тўғрисидаги Низом янгиланди. Депутатлар, шунингдек, Комиссиянинг, ҳудудий ишчи гуруҳларининг янгиланган таркиби ҳамда 2017 йил август — декабрь ойлари учун иш режасини маъқуллашди. 

Янги киритилган тартиб-қоидаларга мувофиқ, Комиссия аъзолари ҳар ойда жойларда бўлиб, 5 — 7 кун давомида соғлиқни сақлаш соҳасини комплекс ўрганади, уларнинг натижалари халқ депутатлари Кенгашлари сессияларида соғлиқни сақлаш муассасалари раҳбарлари ахборотини эшитиш орқали ҳар томонлама муҳокама этилади. Айни чоғда қишлоқ врачлик пунктлари ва оилавий поликлиникалар ишини самарали ташкил этиш бўйича чора-тадбирларни рўёбга чиқаришнинг ҳақиқий ҳолатини ўрганиш режалаштирилмоқда.  

Ўзбекистон Республикаси Президентининг 2017 йил 8 августдаги “Ҳудудларнинг жадал ижтимоий-иқтисодий ривожланишини таъминлашга доир устувор чора-тадбирлар тўғрисида”ги қарорида белгиланган вазифалардан келиб чиққан ҳолда, Олий Мажлис Қонунчилик палатаси депутатлари ҳамда маҳаллий Кенгашлар депутатлари соғлиқни сақлаш ҳудудий муассасаларини қуриш, реконструкция қилиш ва зарур тиббий анжомлар билан таъминлаш мақсадида уларни кейинги йиллар инвестиция дастурларига киритиш бўйича таклифлар тайёрламоқда. 

Соғлиқни сақлаш тизимини ислоҳ қилишнинг муҳим йўналишларидан бири, бу — соҳадаги ҳуқуқий асосларни такомиллаштириш ҳисобланади. Шу нуқтаи назардан, тадбир иштирокчилари аҳолига тиббий хизмат кўрсатишнинг айни вақтдаги аҳволини комплекс равишда ўрганиш ҳамда натижаларини ҳар томонлама таҳлил қилиш асосида амалдаги қонунчиликни такомиллаштириш, хусусан, “Фуқаролар соғлиғини сақлаш тўғрисида”ги Қонунга ўзгартиш ва қўшимчалар киритиш бўйича таклифлар ишлаб чиқилгани хусусида хабардор қилинди. Бунда ҳам фуқаролар, ҳам тиббиёт ходимлари учун халқаро стандартлар ҳамда илғор хорижий тажрибага мос равишда қулай шароитларни яратишга алоҳида эътибор қаратилади.

Комиссиянинг келгуси давр учун тузилган режасида, шунингдек, Қонунчилик палатаси депутатлари томонидан халқ депутатлари маҳаллий Кенгашлари ва фуқароларнинг ўзини ўзи бошқариш органларига тиббиёт муассасалари фаолияти устидан депутатлик ва жамоатчилик назоратини амалга оширишда ташкилий-услубий кўмак кўрсатиш ҳам белгиланган. Мазкур фаолиятнинг очиқлигини таъминлаш, олиб борилаётган тадбирларни оммавий ахборот воситаларида кенг ёритиш, аҳолини ушбу масалалар ҳақида хабардор қилиш ва фуқароларнинг тиббий маданиятини юксалтириш масалалари ҳам қатнашчилар диққат-эътиборида бўлди.  

Тадбирда журналистлар аҳолига тиббий хизмат кўрсатиш ва соғлиқни сақлаш муассасалари фаолиятини янада яхшилаш, соҳадаги қонунчиликни такомиллаштиришга оид саволларига атрофлича жавоб олишди.    

Зиёда АШУРОВА.

 

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn